上莊正傻仔?網民熱數7個不要上莊的原因 浪費時間又無回報

撰文:過期大學生
出版:更新:

大學五件事,其中一樣就係上莊。大家讀書都有唔同追求,有網民就覺得上莊完全係浪費時間,仲數咗7個唔上莊理由嘅理由!你又認唔認同?

【1. 燒GPA】上得莊就預咗會用大量時間做莊務、搞活動,就算有考試,連溫書時間都要犧牲,一唔去就畀人話「潛莊」、「唔合群」,隨時畀人杯添。年中見唔少因為上莊而爛grade爛gpa嘅人,網民話如果真係好care成績,真係唔好上莊喇。(《奶酪陷阱》劇照)
【2. 嘥錢】搞活動就要有經費,啲錢係邊度嚟?咪就係莊員自己畀住先囉,甚至有莊一上就要每人畀定一皮嘢出嚟,claim錢都要慢慢等㗎。如果戶口冇咁上下積蓄,莊期一定好難捱,啲錢好似燒紙咁燒走哂。(《愛.回家》截圖)
【3. 遇著班唔夾嘅莊員慘過食X】明明內部已經四分五裂,又有小圈子,但仲要係人面扮friend。網民話因為上莊,睇清大學嘅人都係好假。(《我的ID是江南美人》劇照)
【4. 用啲時間去做intern或exchange好過】 上面寫咗咁多上莊嘅麻煩嘢,想大學有多啲exposure嘅話不如用啲時間去做intern或exchange好過喇,又學到做人處事同溝通技巧,重點係寫落CV都靚仔啲,返intern仲有錢收添!(《無法成為野獸的我們》劇照)
【5. 畀老鬼X到上天】支支莊都要經歷諮詢大會,如果上咗支階級觀念重嘅莊就洗定八月十五都得,因為啲老鬼會返嚟爆哂粗鬧到你一文不值。佢哋仲會有種唔知邊度嚟嘅優越感,覺得新莊一定要聽哂佢哋講。喂上個莊啫,搞吓活動啫,唔係嚟做奴隸喎!(《愛.回家》劇照)
【6. 想學嘢嘅就咪上莊】 上面提到處事技巧、溝通技巧可以返intern學,咁到底有啲乜嘢淨係上莊先學到?有上過莊嘅網民就話,其實上莊冇嘢學,都係為咗玩㗎咋。如果你係一啲上齊堂,考靚grade嘅學生,上莊真係唔係好啱你。(《我的ID是江南美人》劇照)
【7. 對來未Career Path冇幫助】 付出時間、心機、錢、成績等等,如果換來同等嘅回報當然好,但係上莊注定付出多過收獲。有已經畢業嘅網民幫公司請人,個應徵者係咁講上莊做過乜乜乜,佢就覺得上莊圍威喂嘅事蹟真係冇公司會想知,最後都係實際工作經驗緊要啲。(《未生》劇照)