【流行經典50年】美魔女首唱《我係小忌廉》 戴蘊慧:兒歌有價值

撰文:史順宜
出版:更新:

一星期一集的《流行經典50年》由以往的星期日晚,改為星期六晚9時30分播出,而且節目名更改為《流行經典50年唱爆周末》。今集真係要老土啲講句咩回憶都返晒嚟。因為今集的《流行經典50年》是以卡通片主題曲為主題,總有一首都陪過你成長。如果你識得唱的話,真係想唔認老都幾難。節目今集找來戴蘊慧唱出《我係小忌廉》。人稱為「美魔女」的戴蘊慧。她是已故香港樂壇教父戴思聰的長女。當年以45歲之齡榮升為嫲嫲級。四大天王黎明更是其初戀情人。其實除了以上種種為人所認識外。戴蘊慧當年以16歲之齡唱出《我係小忌廉》更是她的代表作。隨著卡通片成為當時大熱,主題曲當然也是人人都識。

今集的《流行經典50年唱爆周末》為大家帶來多首兒歌金曲。(網絡圖片)
戴蘊慧坦言因為生眼瘡所以素顏演出。(網絡圖片)
「美魔女」稱號,戴蘊慧當之無愧。(網絡圖片)

戴蘊慧接受《香港01》訪問時表示,對今集的《流行經典50年》感到非常興奮:「我哋一班朋友家人特登嚟到我屋企睇。其實今次係我首次喺公開場合唱出《我係小忌廉》,以往都係同朋友唱K嘅時候唱,今次真係將我嘅第一次獻畀TVB。」談到事隔多年再唱歌,戴蘊慧都是抱著輕鬆心態面對:「我真係好多年無唱歌,但係我又無話覺得緊張,只係覺得好玩。其實TVB之前都有邀請我上去唱,不過時間唔啱。直至到8月頭佢哋再有人聯絡我,話《流行經典50年》會有一集以卡通系列為主題好想我唱,所以我就應邀去玩。」

有邊個女人唔貪靚,貴為「美魔女」的戴蘊慧也不例外。雖然她出場時散發出無限仙氣,不過她自言有美中不足的地方:「其實我真係好唔好意思,當日無咩點化妝。希望大家唔好以為我唔尊重大會,係因為拍攝當日我生眼瘡,化唔到妝。所以出嚟嘅效果未必係最好。」

+6
戴蘊慧坦言兒歌其實很有價值的。(網絡圖片)

問到今次唱出《我係小忌廉》帶畀大家不少回憶,其實這首歌是唱出卡通片中主角小忌廉要變成巨星的故事,跟戴蘊慧的樂壇路成很大的對比。對此戴蘊慧說:「唉,我都無諗過咁快結婚,唱呢首歌嘅時候我得16歲,應該係同期華星年代最細嘅一位歌手。亦都因為咁,所以當年黎小田搵我唱呢首歌。當時都無諗過套卡通片會成為經典。」最近有不少上過《流行經典50年》的歌手復出,有些更開騷,不過喜歡享受生活的戴蘊慧似乎未有這個打算:「真係無諗過,都係睇有無時間,一切隨緣。」

談到今集有多位嘉賓唱出經典卡通歌,但來到這個年代,好像已經沒有兒歌能夠和以前相比,戴蘊慧對此有以下看法:「其實兒歌係有佢嘅價值。不過依家時代唔同,以前我哋細細個嘅童年係卡通片,依家啲人嘅童年係打機。佢哋可能會識唱Game嘅主題曲。加上近年好似無咩經典嘅卡通片。」