從感恩節消費睇美國經濟　今年「黑色星期五」女性掃貨恩物係乜？

近年中國國內每逢「雙11」，商家就會將當天包裝成「光棍節」，以大量優惠作招徠，實質是人為泡製出全年網絡購物活動最高峰的一天，既為消費者製造熾熱的消費氣氛，亦為零售商帶來業績大翻盤。
不過，運用這種促銷模式最拿手的其實是美國人，每年感恩節後的一天習慣稱之為「黑色星期五」（Black Friday），其玩法正正是「光棍節」的始祖，而每年感恩節銷情的好壞，往往是美國一年經濟是枯是榮的寒暑表。

你以為叫作「黑色星期五」當天就會很黑仔無運行？非也！查實此黑不同彼黑，這種黑對於美國零售商來說原來是個吉兆。原來感恩節在於美國人而言，等於我們中國人「做冬」一樣咁重要，所謂「冬大過年」，每家每戶都會趁着感恩節到來而四出購物「辦年貨」，在感恩節翌日當天，一天的銷情足以令零售商全年的業績改寫，即是由會計上象徵虧損的紅字，轉化為代表盈餘的黑色。

在過去還是靠前往商店門市購物的日子，「黑色星期五」是商店一年中最重要的日子，其後進入互聯網世代，網購大行其道，各種電子產品更成為世人的心頭好，於是商家又再創造出一個「數碼星期一」（Cyber Monday），為「黑色星期五」來個加長版，促銷電子產品，傳統百貨公司的重要性開始減退，那是後話了。

說回感恩節消費就像經濟寒暑表，能夠看到美國經濟現況，咁今年能看到甚麼呢？這要從觀察甚麼產品最好賣入手。會是名牌時裝？減價電視？iPhone？都太貴了吧。近幾年美國仍然處身於「後金融海嘯」時期，最好賣的其實都係平嘢，講買嘢精打細算就一定要參考女性的選擇吧。

講咁耐，到底女性感恩節掃貨恩物係乜呀？原來係特價19.99美元一對的長Boot！呢款港幣160蚊都仲有找的長Boot，原來係近年百貨公司在感恩節最暢銷的產品，係名符其實的Door-buster，即係一開門就推架購物車入去掃嗰種。

美國百年老店Belk就表示，公司幫呢類長Boot做「大出血」特價已經做咗7年，直頭係全行佢哋玩先；其他大公司好似Kohl’s、Macy’s同J.C. Penney都係學佢咁話。

你可能質疑：「真係咁好賣？」唔係亂吹喎，有數據證明佢真係美國女士恩物。《華爾街日報》調查過近幾年搜尋「Rampage Boots」呢個關鍵詞的Google Trend，發現每逢感恩節前後，呢個詞語的關注度都會急飈；其中响2013年的搜尋率更達至頂峰，點解？因為當年經濟更麻麻，平嘢更搶手。

定價捉心理　100蚊掃5對大滿足

同樣有賣呢類特價長Boot嘅E.S. Orinigals行政總裁Joseph Safdeye就揭開真相，點解要定價做19.99美元？原來呢個銀碼真係一個魔術數字，因為一眾小姐靚太覺得自己能夠拎張100蚊紙出嚟就可以買走5對長Boot仲有錢找，會覺得好抵買。這一類長Boot平時正價係賣49.99至79.99美元一對，去到「黑色星期五」就劈價至19.99，然後過兩日「數碼星期一」就加返價去24.99美元。

做節食飯平咗　又關強美元事？

除咗繼續買平貨，今年感恩節另一個有關經濟的看點就係……食平飯。頭先都講過，美國人過感恩節同中國人「做冬」其實差不多，都係要一家人食餐飯。美國人通常都係食火雞呀、鋸扒呀、薯仔蔬菜之類。不過今年食感恩節飯居然係平咗，據美國農業局統計，一圍有12個菜式，供10人食用的感恩節餐平均價格由去年50.11美元，減少至今年的49.87。

你會問：係咪經濟差食得差咗？又唔係喎。咁關乜嘢事？因為強美元囉！原來美國本土就不斷有生產食物，但係由於強美元關係，令外國、特別係中國對美國食品需求減少，令美國食品在本土出現囤積，結果惟有自己食番晒，今次過節真係好感恩。