【Big Big Channel】出師不利狂收投訴 收唔到驗證Email點玩？
撰文：陳奕熙
出版：更新：
今日是TVB的Big Big Channel「開張」大日子，聽個名完全唔知佢係咩，其實簡單啲嚟講就係一個畀藝人同KOL玩直播同上載影片的平台。感覺幾新鮮，但可惜第一日體驗就出師不利，Android的Google Play入面Big Big Channel評分只得2.6分，是212人有107個畀1星。
Big Big Channel在Google Play過半數負評。（網上截圖）
原來好多人下載後都收不到確認電郵，連帳戶都未能確認根本得物無所用。
「我都收唔到電郵，我要投訴呀點解玩唔到呢隻game唔該你哋啦，可唔可以幫我，你哋快啲跟進啦，唔該唔好再玩我哋，我而家想入，唔該你呀」
「又要我地去DL，又要我地玩你個App，又要扮勁咁驗證Email！！但全世界都收唔到驗證，咁玩條毛吖？唔該唔好扮勁啦！！」
「3小時後才收到電郵，但禁（撳）入link後顯示電郵驗證失敗，tvb服務態度差，事前沒有測試過，每次tvb有關應用程式方面都出問題，希望tvb更（跟）進」
評語清一色投訴。（網上截圖）
不過記者是「幸運兒」之一，Download個App之後好快就收驗證Email，所以率先幫大家睇下個App有咩搞作，直播分咗藝人同達人，而影片就有煮食、搵食、扮靚、親子同後生仔５個分類。
Bob的直播起晒格。（手機截圖）
+3
直播的星真係有好多，好似胡定欣、龔嘉欣、孫慧雪、林頴彤、黃心穎等等都有份玩，直播完都可以睇返轉頭，第一日試玩最多人睇的片大概一兩千左右，之但係記者撳入去睇咗幾個Live，有兩個都遇到黑屏問題，用Wifi玩都Load得好慢，成日都輕輕地咁。
之前已經有傳Big Big Channel開播出現阻滯，而家體驗日都咁，7.23全球啟動個時點算？不過啱啱試行就當畀啲空間進步啦。