陳友縱橫音樂界同電影圈，又北上做過生意，人生經驗豐富，日前他就去到由周國豐、陳淑蘭和陳淽菁主持的YouTube節目《豐陳三俠》做嘉賓，透露曾做生意每日蝕六位數，食安眠藥最終患上情緒病。

陳友稱當年一起身就蝕幾廿萬，他稱：「我哋做藝人，成日寫劇本，好多時都係用個心，用個腦嘅時候我哋又做唔出，做生意梗係唔係咁計啦條數，所以我哋做藝人其實好蝕低，如果你係咁計算，你未必喺台上，或者抒發做戲嘅時候，未必一定做到嗰樣嘢出嚟，所以唔係藝人唔識做生意，可能係做唔出手。」陳友更透露在內地買安眠藥食：「成年幾，積累個壓力又好大，有啲嘢你又唔想放棄就繼續去堅持，食嗰啲安眠藥先瞓得著，但有一個後遺症，我真係勸人唔好食安眠藥。你寧願跑跑跑到瞓低，食嗰啲安眠藥，你會慢慢控制唔到自己，會有啲狂躁感覺，突然間控制唔到自己，有一日我就覺得唔得，唔可以食啦！」他又透露曾食安眠藥以致耳朵「塞咗」，患上交感神經失調。