【起底組】鄧月平演網絡KOL被騙財色 游學修做兵救女神
撰文：何志衡
出版：更新：
鄧月平（Larine）第4部電影《起底組》今日開鏡，Larine身穿粉紅色連身短裙出席拜神儀式。鄧麗欣、陳凱琳、林耀聲同游學修都有出席。
鄧月平（左）首次同鄧麗欣及陳凱琳合作拍戲，覺得緊張，佢話希望拍攝時可以偷下師。
Larine接受《香港01》訪問時主動講家中多咗個新成員：「我養多咗隻拉布拉多（本身有隻松鼠狗），兩個幾月大咋，但係佢好鍾意玩便便，可能我成日拍戲唔喺屋企，佢屙到四圍都係，籠外面又有窗簾都有。」
鄧月平稱自己唔會收兵，但有冇人自願做兵就唔清楚喎。
咁重口味不如講番套戲啦，Larine喺戲中飾演網絡女神，因為俾人騙財騙色而請求網絡起底組幫手搵騙徒，因而認識起底好勁嘅游學修同林耀聲，仲收咗游學修做兵，Larine話：「佢哋幫我起底之後，我又捲入一單解款車事件，搭上咗一個執錢嘅人，但我未知邊個飾演，我就利用游學修嘅感情囉！係有啲收兵嘅成份。」不過佢話現實生活中唔鍾意收兵，唔好誤會佢喎！
鄧月平同林耀聲（右）及游學修（左）對手戲比較多，但沒有感情戲。