25歲中英混血兒溫湯馬仕（Thomas Windle），因參加ViuTV真人騷節目《戀愛Staycation》第二季而入行，簽ViuTV做親生仔後，獲安排主持多個節目《準時開飯》、《淡季報錯團》、《MM730 – 傾 of the World》、《大力情人》等。喺昨晚播出嘅《我要爆Show》，有份主持嘅Thomas出大絕，搵埋七師傅全面「點評」，除咗外表，Thomas仲帶師傅上屋企睇風水，令其豪宅意外曝光。

Thomas屋企客廳極其寬敞，四座位L形沙發旁邊再擺一張電動按摩椅依然空間感十足，而且擁無敵山景嘅露台，擺有四人餐桌以及幾數張高椅。Thomas約3百約呎嘅睡房一分為二，一邊擺雙人大床，一邊則佈置成小客廳，擺有電視、雙人沙發、電腦、以及人咁高嘅士兵公仔擺設。雖然豪宅設計簡約，但七師傅無一滿意，指客廳擺太多毛公仔、油畫，易招惹靈體。