【超時空男臣】70歲姜大衛老馬好專業  唔怕刀生鏽:冇咁利啫

撰文:
最後更新日期:

70歲John哥今日出席活動時不慎跌倒,手踭流血,工作人員大為緊張,但他表示只是皮外傷,叫傳媒不要大驚小怪。

「最鋒利嘅刀都有生鏽的一日」這句是姜大衛John哥經典廣告對白,不過剛過70歲生日的John哥依然老馬有火,日前(9日)出席《超時空男臣》戶外宣傳,天氣30幾度,傳媒與圍觀市民大汗疊細汗,John哥和一眾後輩演員在尖沙咀烈日下乾煎,不用工作人員擔遮擋太陽,活動後更即趕回將軍澳電視城拍新劇《逆緣》,魄力和當紮小生一樣,年紀對John哥來說只是數字,John哥接受《香港01》訪問,表示永不言退,他說:「講真,刀真係有生鏽嘅一日,但冇咁利啫,唔等於要退休。」65歲是香港的退休年齡,問到John哥幾時退休,他說:「做到死嗰日,我死嗰日就係我退休嘅時候,我仲好enjoy演戲,未諗過要退休,但我而家揀戲拍,啱我、又夾到嘅我一定拍,我亦勸所有人唔好退休,尤其你做緊自己喜歡嘅職業,做人唔可以退休,65歲又好,好似我70歲都好,唔好退,就算退,都係半退休,做下義工都好。乜都好,一定要有個寄托。」

John哥後生時多演大俠,近年在無綫劇的角色性格較為較鬆。在《超時空男臣》飾演鳳鳴居老闆。

John哥在《超時空男臣》飾演鳳鳴居老闆,三女之父,現實中John哥在家庭中身兼丈夫、爸爸,曹永廉外父三職,他說:「我平時個人就唔係劇入面咁攪笑嘅,教仔女又好,教孫又好,有少少嚴肅,但帶住個愛嘅,始終同角色有啲唔同,我好少做攪笑嘅角色,就算《公公出宮》都有啲唔同,我仲係學習緊。」

John哥後生時靚仔㗎,唔講係咪以為係周董呢?

後生的觀眾對John哥的認識是TVB的劇集,但其實年輕時候的姜大衛,樣子有點像現在的周杰倫,是邵氏電影著名武打影星,拍過不少賣座的電影《新獨臂刀》《游俠兒》等,當紅程度,和現在的古天樂,劉青雲甚至劉德華差不多,1970年姜大衛憑電影《報仇》獲得亞洲影展(亞太影展前身)影帝,那時他27歲。

姜大衛是曹永廉的外父,二人除了《超時空男臣》外,在《公公出宮》亦有合作。

年輕時是電影界一線當紅小生,到現在為無綫拍劇,焦點未必那麼令人集中,但John哥一早已看透,他說:「由我第一日做電影男主角,我就知呢個道理,沒可能做到70歲都係男一㗎?但我算係好好彩,唔好話男一,而家仲有機會做男二,男三、我自己嘅前輩,由男一做到冇得做,但我今日仲有得做,仲想點?呢個心態我一早就準備好,以前係戲院先睇到,而家手機就得,6、7歲嘅小朋友都仲有機會睇返我嘅舊戲,我係好好彩。」

1971年24歲的姜大衛當《新獨臂刀》男主角,當時紅極一時,差不多40年後,因為一個廣告令大家再記起。

因為那個廣告,後生仔多用獨臂刀形容John哥,他飾演的獨臂刀,只得一隻左手亦戰至最後,到今日John哥仍然有這種俠客性格,即使年紀大,亦不會要求組厚待,在無綫拍劇年紀較大的,可能會要求通告之間有10個小時休息,但他沒有,他說:「我冇提出過,而家啲劇幾條線去,其實冇咁辛苦,拍劇就個個都辛苦㗎啦,就得邊個?佢哋亦已經好鍚我,就算而家有啲動作戲,打戲,如果我做到嘅,我一定自己上陣。」
《超》劇宣傳當日一眾演員在尖沙咀向市民派雪糕,人多擠迫,John哥不慎跌倒,雙手手踭著地「爆晒缸」,工作人員大為緊張,但他處之泰然,記者要求拍照,他帶點不好意思,初時要求John哥做訪問,他誤以為要為受傷一事回應,他說:「擦損少少,唔駛問呀?」因為獨臂刀,手臂有少少血係正常嘅……

+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。