【美食博覽】李家鼎即場教秘技師奶圍實 鼎爺瘦足9磅:停唔到!

撰文:
最後更新日期:

鼎爺同譚玉瑛好有默契,鼎爺仲讚佢:「有佢喺隔離講下呢樣嗰樣先至咁好睇。」(何志衡攝)

鼎爺李家鼎同譚玉瑛今日殺入灣仔美食博覽宣傳第二輯《阿爺廚房》,吸引咗過百位老友記捧場及試食鼎爺手勢。鼎爺透露拍《阿爺廚房》令佢瘦咗9磅,而下月開張嘅私房菜館投資咗7位數,及向TVB請假一個月,未知有冇時間拍第三輯。鼎爺今日可以話將成個《鼎爺廚房》搬咗入美食博覽,即席教現場觀眾煮咗一味雜錦涼拌,現場七成係上咗年紀嘅媽媽級觀眾,好畀心機聽鼎爺教煮餸。雖然呢道菜唔使用明火煮,但鼎爺一樣傳授到秘技:「切皮蛋用刀會黐住咁點切?」秘技係用牙線,鼎爺更示範用牙咬住牙線一邊,用手揸住另一邊,然後將皮蛋𠝹開,全場拍手讚賞。鼎爺又即場傳授刀功,媽媽級觀眾都非常受落。問到鼎爺幾時開始入廚,譚玉瑛就代答:「初初佢爸爸係叫鼎爺阿媽煮啦,但係鼎爺好孝順,以前冇冷氣又用火水爐,佢見媽媽咁辛苦就幫下手,慢慢就喺媽媽度學到嘢,就成就到今日嘅鼎爺。」原來鼎爺拍攝時經常向譚玉瑛「呻」所以至知咁多嘢。

鼎爺即席示範用牙線𠝹皮蛋。(何志衡攝)

鼎爺接受訪問時透露已向TVB請咗一個月假,因為要打理佢投資嘅私房菜,下月3號就會開張,選址銅鑼灣登龍街,現時客人預訂已去到出年1月,佢話有TVB前高層一早就訂位「羅仲炳嗰班呀、周梁淑怡都嚟。(會唔會收平啲?)冇得平,一視同仁,呢啲嘢規規矩矩,但會有啲優惠嘅,唔係錢方面。」佢話會堅持自己買料同下廚,如果要拍劇或做節目的話唯有就時間。

《阿爺廚房》嚟到第二輯,譚玉瑛就話拍攝過程幾辛苦,因為好趕,但自己肥咗3磅,佢解釋:「因為我冇佢咁大壓力。」鼎爺則反而瘦咗:「我瘦咗9磅幾呀,11個鐘頭,1個鐘頭食飯,佢唔係刻薄而係個節目係咁做,停唔到嘅,一停就冇咗個heart。」事後鼎爺將錦繡涼拌分畀現場觀眾,十幾位家庭主婦排隊品嚐,食得津津有味。其中陳太太大讚好味:「我專程嚟見下鼎爺,我細個睇佢做戲覺得佢好惡,原來佢識煮嘢食又咁好人,佢個節目教嗰啲菜都係我細個食過嘅,勾起咗好多回憶呀!我會跟佢煮畀啲仔女食。」

現場有過百位媽媽級觀眾捧鼎爺場。(何志衡攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。