【童年回憶】《閃電傳真機》聚會 譚玉瑛姐姐號召力強一圍變六圍

撰文:
最後更新日期:

「循環不息的宇宙如在照顧著地球……」如果睇到呢句歌詞覺得係有聲POST,咁你就唔覺意曝露咗年齡秘密啦!90年代最受歡迎兒童節目《閃電傳真機》主題曲,當年幾乎個個小朋友都識唱,放學4點衝返屋企睇電視嘅回憶,真係諗起都不禁會心微笑。播出十年間有唔少經典環節,無論主持或小童星都令人印象深刻,日前佢哋舉行聚會,台前幕後足足67位出席,你又認得幾多位呢?

呢個LOGO應該係唔少人嘅童年回憶。(影片截圖)

《閃電傳真機》由1989年9月接替《403穿梭機》,一直到1999年大除夕播出最後一集,整整十年時間,主持人包括譚玉瑛、麥長青、黎芷珊、黃智賢等,帶住小童星們演出一個個富趣味及教育意義嘅環節,好似《Auntie烏卒卒》、《叉燒包與漢堡包》、《殭屍爺孫》、《麥氏偵探社》、《認字特警》等。

人才濟濟呀﹗

眨眼間節目已經完結了十幾年,原來一班台前幕後都仍有KEEP住聯絡,8月19日晚更於尖東一家酒樓舉行「搞大咗《閃電傳真機》同學會」,現任奇妙電視主持黃芳雯(Paula),原來當年係節目小童星之一,見返一眾童年好友同大哥哥大姐姐,佢都表示非常興奮:「其實咁多年來,傳真機各個唔同組別,好似我地小演員同啲主持、製作組等,都會約食飯飲茶,不過今年真係第一次咁齊人,足足有67位﹗」

譚玉瑛、魯文傑、伍文生、蔡子健等一眾主持好似唔識老咁。

朱茵都有做過《閃電傳真機》主持呀!(資料圖片)

譚玉瑛姐姐嘅號召力真係好利害呀﹗

Paula表示本身預計一圍食飯,到最終筵開六圍,估計因為訂好日子後,譚玉瑛姐姐一早確認會出席,所以大家都特別踴躍,個個話想帶多一兩位,就變到咁墟冚﹗「大家都好有心,我提議整banner俾大家影相,anna姐姐話環保啲不如利用場地螢幕,搵佢囡囡幫手整logo。仲有呀,無諗過去聚會都好似婚宴咁有大家成長片段睇,不過唔係一對新人,而係有幕後人員將在場人士當年嘅相同片剪輯埋一齊,足足有成7分幾鐘﹗」

麥包哥哥同Paula的當年今日。

譚玉瑛姐姐整嘅榴槤蛋糕﹗

現場仲有切餅儀式,個大蛋糕居然係譚玉瑛嘅作品﹗身為美食節目主持嘅Paula都大讚好食:「個蛋糕係譚玉瑛姐姐親手整架﹗之前佢都無出聲話想俾個驚喜大家,係個榴槤蛋糕足足五六磅重,仲好好食添﹗」Paula話大家都玩得非常盡興,希望每年都gather一次:「好多人睇完Facebook都問點解唔叫埋佢﹗睇嚟下次要Book多幾圍啦﹗」

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。