【同盟】姚子羚「胡說八道」姊妹逐個講:李施嬅好公主

撰文:
最後更新日期:

胡說八道6位感情要好,最近更一同拍節目。

要知道朋友同你熟唔熟,其實看你和他說話態度就知,㳟㳟敬敬的熟極有限,但要姚子羚講胡說八道5位姊妹,絕對冇難度,李施嬅、胡定欣、胡杏兒、黃智雯、 胡蓓蔚,逐個講,她說:「其實我都唔知成立咗幾耐,我哋上次先傾究竟攪咗幾年呢?6年啩,(有冇試過嗌交?)都有嘅,喺個group chat有時都會嘅,我哋好直嘅,其實我哋嗰啲唔係嗌交,我哋會有咩都直接講,好正常啫,同你最親嘅人,講嘢係唔駛兜圈,大家窒下,講完就冇嘢㗎啦,「唔會話妳嗰妝都化得唔錯,但隻眼就差少少....」唔會咁講嘢,一嚟就妳條眉畫好粗喎,係freind 先會咁講嘢。」

胡杏兒第一個生仔,其餘5位自然成為契媽。

6人感情要好,不過姚子羚表示性格各有不同,豹嫂像是隊長,當大家下不到決定,就由她話事,而她和李施嬅就是負責送花買蛋糕,她說:「我同李施嬅負責送花、買蛋糕,遇到邊個朋友新鋪開張呀,生日呀,咁就我同負責囉,(胡定欣有咩優點、缺點?)佢係一個好勤力,好有要求嘅演員,但有時就係太有要求喇,哈哈,佢係鍾意就鍾意嘅人,好清晰,但佢得意嘅,有時佢都孩子氣,我送咗個Agnes公仔俾佢,佢去旅行都帶住佢㗎,佢instagram成日見到,你就知道佢其實係一個好有童心嘅人。」

胡說八道6位在事業上,獨當一面,其實要約埋一齊食飯,真的不容易,但在姚子羚ig會見到她們經常合體出現,不論齊人與否,開心就是了。

「杏兒係一個工作狂,佢係我哋6個之中處事最成熟,入得廚房出得廳堂嘅女人,阿豹 (胡蓓蔚)就好直率,好似一個大家姐咁,佢會主動問姚子羚呢輪點呀?佢好照顧我哋,佢試過無端端揸架車嚟接我放工,去佢屋企又會煮咖啡我飲,整牛角飽我食,係一個口硬心軟嘅人,當我哋決策唔到呢,佢會衝出嚟幫我哋決定,智雯係一個儍更更嘅女仔,我哋成日笑佢㗎,好大頭蝦,我哋坐佢車好驚,佢揸車好驚險,但佢冇脾氣㗎,百搭嘅,邊個同佢出街都會好舒服,佢好就得人,Selena(李施嬅)好自己嘅,好適享受生活嘅女仔,成日覺得佢係公主嚟,但強調唔係公主病,佢好準時㗎,我意思係佢好優雅,我同佢出街最多,基本上妳問佢邊間最好食,邊間做spa一流,問佢就一定知。」

姚子羚非常欣賞胡定欣,覺得她非常勤力,係一個好好學習的對象。

娛樂新聞愛以比較做標題,6位姊妹發展有不同,旁人眼中可能有高低之分,但姚子羚覺得只有互相欣賞,她說:「要比較當然同自己啦,同人比較永遠唔完,應該諗我之前做得唔好喎,係咪而家要做好啲呢?我會覺得佢哋係高榜樣,杏兒、定欣點解咁成功呢?我應該係去學習佢哋,人哋成功梗有原因,可能係好勤力,好有天份,咁我應該係去學習觀察再改進自己囉,(妳哋有冇為男人嗌交?)冇喎,都冇男人點嗌呀?哈哈,唔係呀,有男人呀,嗰個係豹哥,但我哋冇當過佢係男人,佢好好,好鬼鍚我哋㗎。」

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。