【早霸王】怕醜仔拖到女神準備打上電台表白 結果連森美都呆咗!

撰文:
最後更新日期:

愛情有幾可風平浪靜?商台節目《早霸王》又遇上非一般case,怕醜仔阿龍鍾意咗清純義工妹,連手都拖過,但當森美同小儀諗住呢鋪做得成邱比特嘅時候,真相令身經百戰嘅佢哋都啞咗兩秒!

森美、小儀呢次又啞咗,不過咁個節目至有趣嘛!

上星期已婚男向人妻訴心聲之後,今日嘅《早霸王》表白時段看來平淡好多,仲幾有初戀feel。聽眾阿龍同心儀對象Carly都係做義工,相識一年多,阿龍同森美、小儀講女方好文靜又有愛心而且相處得好好,放假都會返公司約女方食飯,不過Carly有個奇怪習慣:「有樣唔好,Whatsapp佢唔覆我、藍剔我,已讀不回或者不讀不回。」森美疑惑:「咁奇怪?佢咁熱心嘅人竟然對身邊嘅人咁冷淡?好恐怖喎!」小儀就話:「其實好多人都會唔記得嘅!」但未能解除森美疑慮:「已讀不回代表對你好冷漠連朋友都不如喎!」

森美繼續追問:「有冇啲嘢都似觸到底線呢?」阿龍稱Carly曾有所暗示:「睇電影都有親密嘢,佢挨埋嚟我捉住佢隻手。」森美「哦」一聲之後問:「你睇完戲唔繼續拖住佢?」阿龍竟然答:「我衰啦我放開咗!」森美即刻好勞氣:「你拖住嗰下點解會放呢?你諗乜嘢呢?」阿龍:自己驚囉!」森美爆發:「拖住咗都驚?」

森美即將放大假,好似真係鬆咗口氣。

然後阿龍稱拖過手之後Carly對佢態度亦有好轉,會不時send生活相俾佢,食到好味雞蛋仔又會提議阿龍下次去食,似乎好有機,連森美都話:「我覺得有信心喎!」

於是森美、小儀就致電女主角Carly:「Carly有個男仔打嚟話鍾意你暗戀你喎!想唔想知係邊個呀?」Carly答:「想呀!」森美繼續問:「你身邊有冇啲咁嘅男仔呀?」點知Carly咁答:「唔,我有男朋友個喎!」小儀反應比較快:「下!你拍咗拖幾耐呀?」森美連忙問:「嗰個男仔係咩人嚟?」Carly好怕醜咁講:「唔方便講喎!」森美同小儀即時靜咗兩秒,然後傻笑:「我想問你同你男朋友感情好好?」女方只答咗一個字:「唔。」就收咗線。

今次示愛對象竟然有男朋友,森美、小儀都呆咗唔識畀反應。

森美然後質問阿龍:「點呀!喂喂喂佢有男朋友你知唔知呀?」阿龍愈講愈細聲:「冇聽佢講過喎!」森美唯有勸佢:「第一件事佢未結婚,之前嗰啲結咗婚都有,有男朋友啫,未必一定長嘅!我唔係咒佢,但愛情係咁樣嘅,靜觀其變囉!」阿龍收線後森美至鬆一口氣:「又多一個原來唔知暗戀嘅人有男朋友,下個禮拜放假喇!」連續幾次俾聽眾考起,森美真係要放假回下氣喇!

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。