《賭城群英會》續集《荷里活有個大老千》 劇名已經令人好想睇

撰文:
最後更新日期:

《荷里活有個大老千》早前正式拜神開鏡。(Instagram圖片)

萬眾期待的《賭城群英會》終於有續集,個名叫《荷里活有個大老千》,雖然叫續集,不過將會是一個全新的故事,一批新的演員。不過無論劇本點樣轉,演員點樣唔同,最重要的始終都會出現,無錯喇,就係叻哥陳百祥繼續擔當男主角!還記得在《賭城群英會》上,叻哥的精湛演出已經令觀眾拍爛手掌,尤其是一場喊戲,感動萬千觀眾,相信今年視帝一定要預埋佢一份。

叻哥演技又要大爆發喇。(劇照)

講開視帝,這套被視為下年無綫重頭劇的《荷里活有個大老千》,叻哥隨時有機會連續兩年競爭視帝,爭取連任。不過同劇兩位男主角都唔惹少,分別是肥貓鄭則仕和近年閃現的湯鎮業,(《心理追兇Mind Hunter》客串5集),以王晶的號召力當然不只咁少人,還有剛剛在海外拿到影后的李施嬅,晶哥兩大愛將何浩文加文凱玲,連自己個囡王子涵都出動埋。《香港01》向同樣有份的吳業坤了解,他表示已經為該劇進行拍攝,還有近年經常出現在電影的蔡瀚億和莊思敏都有份,今次真係星光熠熠耀老千喇。

何佩珉都有份演出。(Instagram圖片)

剩係睇個名《荷里活有個大老千》,相信大家一定會想起荷里活有間大酒店呢句經典俗語。有膽色起這個劇名已經證明Cult味十足,再加上晶哥出品必屬佳品,近年他的電影票房又咁好(喺大陸),令到我已經急不及待想睇睇了。話說暫時放出來的照片多數都是70年代的造型,相信今次套劇的背景會是圍繞這個年代,而70年代的香港是貪污最猖獗的時代,難道今次講賭之餘仲會講貪污?

無綫綠葉張智軒都有份。(Instagram圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。