【喜劇之王】細細粒變身大胃「韓小紅」 極速KO雞髀茶水無難度
撰文：張嘉敏
出版：更新：
（左起）鄧兆尊、楊詩敏（蝦頭）、阮兆祥（祥仔）以及陳嘉佳（細細粒）一齊發揮搞笑本色。
圈中有唔少扮嘢高手真係扮咩似咩，帶給觀眾好多歡樂，當中就包括阮兆祥（祥仔）、陳嘉佳（細細粒）、楊詩敏（蝦頭）以及鄧兆尊。他們早前就一齊發揮搞笑本色，分別以「杜小莎」、「韓小紅」、「林小蓮」以及「迪小希」的造型亮相內地綜藝節目《喜劇之王》，表現出精彩的扮嘢強項，更贏得該單元的冠軍。而在他們4人之中，就以祥仔同細細粒最搶鏡。祥仔大唱惡搞版《卡門》，又拍片拿同公司藝人杜麗莎來開玩笑，非常搞笑。細細粒就盡展她的「大胃女」神技，表演驚人絕技：一口KO大半隻雞髀，10秒鐘KO兩公升茶水，食得之餘仲夠晒快，相當犀利，看得現場觀眾O晒嘴。
細細粒鯨吞雞髀。
事後細細粒表示為今次的演出做了唔少準備工夫，咁食法可以話係搵命搏：「真係幾辛苦，我飲完之後係咁作嘔。為咗表演呢個環節，我下咗唔少苦功，仲好大壓力。除了之前不斷練習灌水，等個胃慢慢適應，表演前一日仲特登食了好多好重味精的食物，到當日表演前，我又完全唔飲水，咁樣我唱完歌之後，先自自然然會好口渴，就可以狂飲嘢。不過只要觀眾睇得開心，我哋辛苦啲都無所謂啦。」
細細粒表演扮嘢同搞笑兼做埋大胃王，她扮的是「韓小紅」，似唔似？
祥仔扮的「杜小莎」好搶鏡，冇得輸。