【壹號皇庭】扮師爺同毒犯傾偈攞料 監製鄧特希:最怕俾差佬揭穿

撰文:
最後更新日期:

鄭秀文20歲拍《壹號皇庭》,那時的她包包面,其實幾得意。

25年前劇集《壹號皇庭》最近深夜重播,但依然有不少人追看,經典作品一定有過人之處,這套作品對當時TVB及香港觀眾來說都比較新鮮,歐陽震華、陳秀雯等主角,對白經常有大量法律專有名詞、每集都有超過20分鐘的法庭戲,充足的資料搜集,亦比以往認真,監製兼編審鄧特希,當時為了劇集的真實感,試過假扮律師行師爺,跟真律師工作,更要接觸毒犯,他說:「因為我同當時嘅團隊,好想做到嗰種質感,一個律師係嘅呢?其實律師劇當時對無綫係新咋,外國已經好流行,我哋揾個律政處攞料,問過律師、差人攞料,但我發覺都係唔夠,因為你就咁問,好一柀一眼,得出嚟嘅好表面,所以我試過假份師爺,跟真正律師開工.....」

黎耀祥拍《壹》第一輯時28歲,為其中一集單元主角,之後更以不同角色亂入,而陶大宇飾演風流律師,當時29歲,好後生呀!

「因為我想知差佬點做嘢,律師係點樣跟單case呢?憑空想像都得㗎,嗰個年代又冇互聯網,但係感覺唔實淨囉,(你當時已係監製?)係呀,有咩問題,因為我真係想知,當時有個律師同我講:「我下晏會去酒樓見個俾差佬通輯嘅毒犯,咁你嚟唔嚟?」我話梗係嚟啦,我就扮係師爺跟住個律師,咁我就知道,真實嘅律師係點樣同毒犯傾偈嘅呢?一個毒犯嘅心理、思維係點?我最記得嗰次係星期六下晏,我同律師仲有個真師爺,跟個毒犯返屋企,因為律師想睇下差佬點搜過間屋,原來差人搜屋係點地板都撬爛埋,我真係要見過先知,律師原來又唔會直接同個毒犯傾偈喎,佢會同個師爺講要點,之後再由師爺同個毒犯再傾,因為佢要避免律師教過毒犯做嘢,而嗰日我又明白原來自首都要睇時間,嗰日係星期六,文書嘢冇人做喇,咁就一定掟你去臭格(覇留室),直到星期一朝早九點,咁即係你而家去自首有一日半喺臭格,咁最後個犯當然星期一先自首啦。」

【壹號皇庭】將會在深夜時段重播5輯,大家真係有排追。

為了攞料,鄧特希做了師爺,游走電視台、律師行、差館,除了清楚知道很多法律程序,更了解到一些真實人物的心態,他說:「譬如一個毒犯點睇坐監?佢哋知道衰咗啲嘢係抵坐監嘅,就算打唔甩都冇得怨,甚至佢哋會令自己舒服啲,佢哋會諗,我個年如果唔去坐,我就避唔到嗰次劈友,死嗰個就係我喇,所以嗰天要我坐監係好㗎,你唔真係接觸過呢啲人,你點會知佢哋點諗嘢呢?嗰次因為我扮師爺,嗰犯同我傾咗好多嘢,(唔怕穿煲?)唔驚呀,我最驚係俾差佬踢爆,因為如果你係師爺,差館係有個list,結果有次差佬發現我唔喺個list入面,但只係叫我出返去咋,所以都好彩。」鄧特希更表示資料搜集不是找個專家詳談就算,要對整件事充滿好奇心,他亦覺得現在無綫有些劇集,資料搜集不夠認真,他說:「就簡單嚟講夜場查牌,班編劇有冇真係了解過差佬點查牌呢?如果有,佢哋唔會寫得咁幼稚,查牌有程序㗎,我見有啲劇集係完全錯哂,觀眾而家嘅生活體驗好豐富㗎,佢哋一睇就會覺得好流,我覺得就算你跟唔上觀眾嘅口味或者經驗,但都要盡量貼近先好放喺劇本到囉。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。