戴耀明短訊向佘詩曼示愛　綠葉王好勇敢：話好掛住佢

戴耀明同佘詩曼喺03年拍《金枝慾孽》時認識，繼而暗戀阿佘，但呢段感情一直收埋喺戴耀明心裡面。直至最近跟拍拖5年嘅圈外女友分手之後，感情冇着落，勾起咗佢對女神回憶的愛火，戴耀明喺一次飲酒之後，借醉以短訊向阿佘示愛：「我同佢講如果將來搵到錢就娶佢做老婆，同埋話好掛住佢。」不過阿佘聽完冇反應兼轉話題，戴耀明亦冇再提起：「後來冇乜點，只係醉酒事啫，大家好朋友冇放喺心，我冇妄想過會同佢一齊㗎！不過到而家我都冇拍拖，我成年冇拍拖喇！」

問佢係咪同女友分手後覺得佘詩曼好啲所以向佢示愛，戴耀明就大笑：「brother，你講到好似我有得揀咁嘅！」唏！愛情無分貴賤，劉浩龍同容祖兒都撻着啦！不過戴耀明真的視阿佘為女神：「太完美嘅嘢，遠望係最好嘅！好似好多人喺教堂睇見神像一樣，你只會去欣賞而唔會走近去掂佢。佢真係正爆，戲好人好，佢好似神一樣，太完美！」甘唔甘願做阿佘隻兵呢？「佢唔係呢啲人，佢係好有義氣、爽直、有愛心嘅人。」佢話好期望再同阿佘拍劇，就算有機會錫下面都開心。

佢強調同阿佘只係好朋友關係，但冇私人約會過，十幾年嚟都只會約埋戚其義、黃德斌、周家怡、韋家雄等成班聚會。

戴耀明現時除咗喺TVB拍劇，最近打入內地市場，早前更喺內地電影《爆裂老婆三歲大》做男主角，又拍咗幾套內地電視劇，而且收入好過TVB：「一有時間就會上內地拍下嘢，喺內地工作真係好開心，對我好好，多戲份，合理價，又識得尊重，有呢3點我相信已經冇嘢好投訴。」不過佢話有時會掛住香港，同埋自己曾經患焦慮症：「我年青嘅時候有焦慮症，坐坐下巴士因為太多人空氣焗要即刻落車，又試過陪媽咪去多人嘅地方，突然呼吸唔到，依家好番啦！但仍然有擔心嘅性格，有時打電話畀媽媽佢唔聽，我又諗多咗，心諗唔係呀嘛，但可能佢只係大便。」