【TVB Secrets】臨時演員電視城慘遭白眼 判頭:保安當我哋賤民

撰文:
最後更新日期:

城巴為電視城主要交通工具,但臨時演員不得和藝員、職員、記者等一同排隊,要排在另一邊,等其他人上晒車先可以上。

TVB臨時演員其實真的比《喜劇之王》尹天仇更辛苦,除了要著超臭衫,人工低,最慘是被人白眼,電視城保安對臨時演員定下不少苛刻條件,非常之不合理,坐廠巴便是其中一個例子。首先要大家理解入電視城的方法,事關電視城地點位於將軍澳工業邨,相當隔涉,大部份職員、藝員、或者要入電視城工作的人,通常會於將軍澳地鐵站,坐無綫提供的城巴,(下文稱為廠巴),大部份臨時演員,亦當然會選擇坐城巴入城,而離開電視城大部份人亦是靠城巴,因為既方便又快捷而且免費。

放工時間,藝員職員排隊上城巴離開,臨時演員想上車,真的難過登天。

排隊搭車天經地義,藝員、職員、記者或其他入城的人,都可以排隊上車,但這條隊臨時演員不可以排,只可以排另一條隊,臨時演員判頭阿強(化名)說:「條例係TVB保安定,我哋都唔知點解,點解唔可以一齊排大隊,只可以排一條叫臨時演員專用嘅隊,專用意思係最遲上車,當所有人上晒,仲有位先可以上,放工時間基本上我哋上唔到車走,(係咪你哋太多人?)唔係!即使我哋得一個人,都唔可以排大隊,有啲保安玩嘢,就算我哋得幾個都唔放俾我哋同人一齊排隊,我哋唔係成身臭汗喎?點解要咁樣歧視我哋先?但有啲熟咗嘅,都會側側膊放我哋上去。」有人表示這制度,是保障員工,除臨時演員外,其他外來人和臨時演員一樣,都是排另一條隊上車,沒有特別歧視臨時演員,但記者多次出入電視台,更和一些非無綫員工例如dancer、經理人助手等,離開搭城巴時,都是跟無綫員工排同一條隊上車,並不需要排另一條。

尹天仇被劇務鬧,但無綫臨時演員更要被保安當犯看待。

而TVB保安對臨時演員好似仇人一樣,不時刁難臨時演員,阿強說:「佢哋覺得自己係差人,我哋係犯,賤民,好多年前出嗰張通告,俾我哋臨時演員公司,其實係一張地圖,叫我哋只能行過邊度,規定我哋行邊去邊,冇事就只可以返休息室,個休息室係兩個貨櫃嚟,好彩都有冷氣,但有時幾十人困喺到又著臭衫,根本上好難頂,如果我哋被保安投訴,好多時都會被停通告,冇工開,同埋我哋喺check point2(側門閘口)入,唔可以喺check point 1(正門噴水池位置)入,連送貨嗰個都可以,但我哋都唔得囉,驚我哋影響image啩?」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。