劉鎮偉拍《西遊記》電視版太爛　黃子韜演孫悟空：看懵B了

拍過N咁多個版本嘅《西遊記》，至今似乎依然係周星馳主演嘅《西遊記之月光寶盒》同《西遊記之仙履奇緣》最成功，至少loop到今時今日，觀眾都重識笑。而同《西遊記》糾纏多年嘅劉鎮偉，雖然曾經話過唔係好想再拍，但去年一樣為內地劇集《大話西遊之愛你一萬年》做導演。紫霞一角起起用女新人趙藝，而前韓國男團EXO成員黃子韜則一人分飾至尊寶同孫悟空。劇集上星期首播，畫面一嚟就男女主角於城樓上對望，並配上開場白：「曾經有一份真摰的愛情擺在我面前……」搬字過紙唔緊要，但都麻煩交少少戲，明明係深情一幕，但黃子韜似乎只顧住chok同chok。

再嚟係特效，全劇55集，每集45分鐘，雖然話CG佔一半，又話特意搭建牛魔王俯等場景，但每個CG都好似卡通片咁，網民仲話唔少國內動畫特效做得好過《大話西遊》，更問既然搵得荷里活團隊化妝，但點解孫悟空個妝可以其醜無比，而有部分猴孫更只係用腮紅了事。不過，最好笑嘅係由內地演員蔣龍飾演嘅六耳獼猴（假猴王），戲份比黃子韜更為多，唔講真係以為佢先係主角。粉絲心痛之餘，連黃子韜都透過微博表示：「六耳獼猴 不是我喔」並指劇集剪接係有啲亂，自己睇完都覺得怪，又話劇集已經係兩年前拍，所以有好多不足之處，希望觀眾可以留一留手……前後加埋四段留言，証明黃子韜真係幾在意。

《西遊記》是經典，但近年愈做愈不堪，到底錯在哪？去年一部號稱終結篇嘅《大話西遊3》，由韓庚、唐嫣等人主演，並搵來莫文蔚再演白晶晶一角，內地收3億，但返到香港，上映7日就落畫，票房加埋得20幾萬，比當年星爺的上下集2,500萬同2,800萬票房，真係天與地的距離，亦似乎証明沒有周星馳的《西遊記》，就算唱幾多次《Only You》都無用，而該戲更令劉導演去年「勇奪」最令人失望導演。劉鎮偉近年無限消費《西遊記》，並伸延出《越光寶盒》、《情癲大聖》等作品，觀眾唔buy都係預期中事。今次轉攻劇集試水溫，結果同一下場，或許是時候收手了。