【專訪】黃心美提起前夫 「好似有條疤痕咁,呢一世都唔會平。」

撰文:
最後更新日期:

笑起上嚟心美同心穎真係好似樣。(林迅景攝)

「我宜家平均一個月搵30萬。」黃心美說。「結婚冇人會諗離婚。」5年婚姻,不算長,也不算短,問起原因時,心美只是簡單一句:「因為過咗我嘅底線」作為解釋。問起她對這段婚姻的感覺,心美有一個很浪漫的答案,「傷過之後好似有條疤痕咁,呢一世都唔會平。」做女強人唔易,尤其是在華人社會,女人搵錢多過男人本身就係一條死罪。正如上一篇黃心美的專訪說到,她是「女人外表,男人內在」。到底原因是不是因為她太強勢呢?其實只有她們倆人知道。一個在台灣工作,一個在香港發展拼搏,差距可能不止是錢銀上的問題。又或者只是如心美所說:「wrong person at the wrong time」。

黃心美影相時好專業。(林迅景攝)

唔慣影相,但係舉手投足都好吸引人。(林迅景攝)

「我唔係好適合喺TVB做。我覺得同好多部門打交道,人多是非多。」問起黃心美為甚麼不過檔TVB拍劇時,她解釋道。「大家唔好再一廂情願,首先嗰邊冇offer我,自己都覺得宣家好舒服。你話會唔會更加好呢?我已經每日對住個妹一齊生活,係咪要連返工都一齊對住呢,亦都唔係好事。」外人看起來,黃心美與黃心穎兩姐妹,一個在ViuTV/NowTV,一個在TVB發展,所以很易就會聯想到這個問題。一屋人4姐妹中,黃心美(Scalett)是大家姐,心穎BB排行最小,而她們又先後加入娛樂圈。樣子,事業,感情生活甚至身材也時常給人比較(最近網民又傾向心美多於心穎)。尤是最近姐姐黃心美的ViuTV節目《暗中旅行2》熱播當中,而黃心穎的《雜警奇兵》又在播放。妹妹黃心穎的人氣就不需多說,有名你叫「心穎BB」,而姐姐黃心美近幾年亦確實人氣急升。

一睇就知係姐妹。(Instagram圖片)

「我反而仲多謝我阿妹添。譬如近呢2年越嚟越好,其實我阿妹幫咗我好多。因為我阿妹,多咗人知我係邊個,或者宜家越嚟越多姊妹檔,有啲咩唔好呢?我唔會介意話風頭被搶,我哋姊妹嚟㗎,點樣都會想佢好㗎嘛。又唔可以好過妳咩?唔會㗎。有咩問題吖我想問。」原來報章雜誌或者街外人的觀點都是錯的,還十分膚淺。放心,佢哋2姐妹冇不和,只係個際遇唔同,各為其主其實都冇咩問題。「一來友台冇搵我拍劇,二來只係你哋一廂情願覺得大台好啲。其實係咪好,就未必囉。即係因為嗰邊競爭大,可能發展冇宜家咁好。另外就係真心,既然宜家做得舒服,呢間公司合作得耐又OK,咁點解唔繼續呢。」

心美冇心穎個種甜,但係就多咗份成熟。(林迅景攝)

不過心美解釋道她不想在TVB的主要原因。「可能係我性格問題,我唔係好適合喺TVB做。我覺得同好多部門打交道,人多是非多,我好怕呢啲嘢。點解因為NowTV同ViuTV咁適合我,人又唔係好多,總之我做到自己嘢,唔使拍人馬屁。亦都因為人少,是非又少。」是非這種事,有人喜歡有人厭惡。正如上一篇專訪說的,黃心美性格爽直而不拖泥帶水,人少啲更可以令她專心工作又確實冇錯。

心美話,佢做MC嘅堅持係一定要背稿。(Instagram圖片)

黃心美不想在TVB拍劇,其實還有另一個原因。「唔係唔鍾意拍劇,因為之前ViuTV都有拍劇,而係出面job好緊要。」這時候她經理人補充道:「因為一接咗套劇,佢就有義務要專心拍好套劇,出面工作(司儀工作)就接唔到。好似之前接咗ViuTV套劇,嗰幾日出面工作就要停曬嚟專心拍劇。」黃心美的事業路,其實並不如大家想像的這麼輕鬆。「嗰時有3年喺唱片公司做歌手,一來冇收入,二來搵唔到食。搵唔到食係最主要原因,另外一路行落嚟,都覺得自己唱歌唔係好好聽啫。其實都唔係好鍾意唱歌,如果唔係點解會3年之後就放棄呢?好多人一路追住個歌星夢。因為我知道我要搵食,我要生活吖。我大學畢業之後,簽嗰3年唱片合約收入都係極少,然後個個月都要攤大手板問我老豆攞錢,呢樣嘢係我接受唔到,都咁大個人。At the same time,作為一個大家姐都要做一個好榜樣畀啲妹睇。所以過咗嗰3年個人就要醒,要自己照顧自己。」

黃氏姐妹,兒時多可愛。(網上圖片)

黃心美這麼努力「搵錢」的原因,除了把握工作機會之外,可能更是因為兒時窮過。「細個嗰時屋企都幾窮下,一家人連埋3姐妹迫喺200呎公屋入面。之後心穎出咗世之後先夠人數可以換居屋,生活先越嚟越好。嗰時老豆要供書教學,而媽媽同嫲嫲就剪下線頭同埋照顧我哋4姐妹。」心美在加拿大畢業回港之後,就加入了唱片公司。結果,3年內零收入(其中一年在TVB做主持,萬六人工還需要與唱片公司平分)。其後轉加入NowTV,之後結婚,離婚,再到現在演藝事業的成功,當中花過多少努力,真的只有自己最清楚。

到底女強人係咪唔可以有愛情呢?

有幾多人知道,黃心美實質上係一個女強人。(林迅景攝)

+6
+5
+4

髮型:Cedric Tsang@Nova Hair Nail
化妝: Dera Tse
服裝:Ted Baker

場地贊助:AWA Teasha Lounge

「女人嘅外表,男人嘅內在」(林迅景攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。