【袁偉豪戀情】張寶兒岑杏賢首度同場　呢個安排真係好公關

張寶兒（Bowie）近期跟袁偉豪打得火熱，又被人影到去日本，又跟埋返屋企，真係好多新聞！今日Bowie出席一個活動，竟然係同袁偉豪的前度岑杏賢一齊出現，真係唔知TVB有心定無意。不過兩個人同場都好自然，未見有互相黑面的情況出現，反而大家仲笑笑口，不過真與假就唔知喇。

《香港01》記者找來兩位當事人做訪問，Bowie就話：「今日心情愉快嘅，其實我哋真係無乜尷尬，反而可能身邊嘅人會多啲。其實拍拖兩個人嘅事，可以自己解決嘅。（中秋同袁偉豪過？）中秋節我同屋企人食飯呀，袁偉豪去咗布拉格拍《再創世紀》，我哋之前已經食咗團年飯架喇，屋企人都見過。我屋企人都幾欣賞佢，覺得佢係一個好有承擔嘅人，因為食過飯傾過偈，亦都覺得佢係有前途，同埋係一個有作為嘅青年。」看來屋企人已經開晒綠燈，進度唔錯喎。

下面幾張圖可以睇清楚岑杏賢嘅心路歷程。

當然，要問埋另一位當事人岑杏賢喇，大家都想知究竟係咪真係無尷尬，她說：「其實唔會尷尬呀，我同Bowie始終都係同事，雖然無私底下出飯，但之前影TVB月曆見過，羅天宇生日又見過，我哋都會互相睇大家Instagram story，（見到佢哋合照會唔會唔舒服？）緊係唔會喇，人哋有新戀情，我見到佢哋拍拖，搵到鍾意嘅人都好開心，一定會祝福佢哋，最緊要佢兩個開心，。反而外面嘅人會戥我哋尷尬，但其實我哋自己無事，亦唔覺得呢個安排奇怪嘅。我哋事先一早知道會同場架喇，緊係覺得無嘢先會今日喺度出現喇，如果有客戶鍾意我哋絕對唔介意繼續架。」一個大方，一個得體，最得益一定係袁偉豪。