【開心速遞】風少陳浚霆離巢　直指人工超過八千：啲報道亂咁寫

如果大家一直有追看《愛·回家之開心速遞》，你會發現熊家入面隻鬼風少消失了一段時間，原來飾演風少的陳浚霆（Andrew）已經剛剛完約，離開無綫。他在2014從美國紐約大學以雙榮譽學士畢業回港後，便參加TVB的《超級巨聲4》，雖然最終落選，卻加入了2015年的藝員訓練班，自此便開始了其短暫的TVB生涯。

講起他的演藝事業，除了風少之外，其餘的劇集主要都是客串性質，所以基本上沒有甚麼代表作。最為人記得的是綜藝節目《街市遊樂團》，原因是當時江美儀在節目中經常鬧Andrew，雖然兩位當事人都聲稱是節目風格，不過依然惹起不少討論，話抵Andrew唔抵。不過他在接受《香港01》訪問時說這個絕對不是他離開的原因：「絕對唔會因為不和而想離開，但江美儀對我真係影響好大，就算我想走我都第一時間搵佢傾，佢都會幫我分析，有時仲會幫我搵埋job，都算係我半個師傅。其實拍《街市遊樂團》一開頭我未必見到佢，係佢話想搵個人幫手拎嘢，我先有機會同佢、麥長青同滕麗名合作，我真係好多謝佢哋三個。嗰陣就算我出街都好多人叫我唔好俾美儀姐鬧，佢哋唔明呢個係節目效果，我同佢close到一個點係一齊去旅行，我成日都會買嘢孝敬佢，所以我認咗佢做契女喇，因為年紀上又無理由叫做契媽，唔認做契姐因為唔想俾佢叫契deedee，所以咪認佢做契女。」

Andrew的父親於2003年娶資深藝人顧紀筠為妻，雖然是後母，不過Andrew與顧紀筠的關係十分良好。好多人都說他是靠媽咪的關係才在TVB得到機會，不過Andrew就表示不認同：「其實佢對我唔算特別大幫助，佢自己都話想幫都幫唔到，因為佢以前同唔係拍開劇，對於劇組嘅監製或者珍姐啲高層佢都唔熟悉。我其實都成日做啲二打六角色，好似《老表，畢業喇！》咁，嗰陣同阿蟹（呂慧儀）一齊睇套劇，我話我有份做，佢都好驚訝原來我有份，佢緊係唔知喇，佢係坐喺後面嗰堆學生渣嘛，如果我媽咪有幫到我手就唔使用咁多呢啲角色喇。」其實Andrew入行三年除了《愛·回家之開心速遞》的風少之外，其他都只是二打六角色，的確機會其實並不算太多。

那麼究竟甚麼原因令他離開呢？原來是想趁後生出外闖闖，證明自己的實力，他說：「其實係因為完咗約先離開TVB，監制同高層都搵我傾過，但我覺得自己唔趁而家走，到續多幾年約人又大咗，就會無咗魄力出去闖。而家喺大陸都傾緊啲劇喺年尾或者下年開，喺TVB做嘢受到好多保護，我都想試多啲新嘢，始終喺度學咗咁多，都想證明吓自己。我都想繼續唱歌，始終喺TVB無機會，當初《超級巨聲4》入行後都有抗拒過拍劇，嗰陣對拍劇完全無感覺，亦都唔熟呢樣嘢，但上完訓練班之後又覺得幾好玩，尤其當你遇到一個好對手同你做戲，原來真係會上癮。（有報導話係因為人工低？）出面話我得8千人工就假嘅，佢哋亂作架啫，人工係唔止呢個數，生活到，當然返大陸做嘢人工係吸引好多，但如果係一個好角色我又唔介意低人工。其實喺TVB都唔會好介意佢個人工，始終係大台，個平台同資源都夠大，呢啲係其他台俾唔到嘅。今次離開同公司完全係和平手分，亦都無話嗰啲咩高層內鬥嘅犧牲品，佢哋都有祝福我。」話時話，咁隻鬼風少點算呢？暫時都仲未有定案點令佢離開劇組，不過無論如何，希望Andrew之後會有更多的演出機會喇！