【使徒行者2】大結局後各人咩結局? 編審同你講第三輯進展

撰文:黃梓恒
出版:更新:

《使徒行者2》終於大結局,所有恩怨情仇、勾心鬥角都將會在今晚劃上一個句號。黑警方面,最後的大黑警許Sir(鄧梓峰)已經被樂少(周柏豪)殺死,所以呢條線已經完結,CIB亦重新由卓Sir(苗僑偉)和康Sir(歐瑞偉)掌管。兩大社團長興、福和仍然各施各法,以跨國洗黑錢集團作為戰場,暫要將對方置諸死地。而樂少死後,梅姐傷心欲絕,徐天堂(袁偉豪)能否乘虛而入?一向比較冷酷的Scarlett(宣萱),在魏德信(陳豪)和卓Sir之間又如何選擇?

下文有大結局劇透,逃生門在此。

樂少死得好慘呀。(劇照)

先講兩大社團的爭鬥,歡喜哥雖然被(許紹雄)魏德信陰了一局,令其身陷險境,不過在梅姐和天堂的無心插柳下,終於可以一報殺妻之仇,親手連開數槍射殺魏德信。不過奇就奇在,卓Sir明明當時就企喺佢隔籬,竟然唔係拉佢返警局,所以歡喜哥好安全咁同猜fing(林偉)走佬去泰國,東山再起。

歡喜哥最終決定唔自首,同「猜fing」著草去泰國。(劇照)

咁兩大女主角Scarlett同梅姐究竟情歸何處呢?其實在魏德信死之前,Scarlett已經表明願意同佢遠走高飛,只不過魏德信認為要搞掂返黑錢呢單事先肯走,最終遺憾一生,而Scarlett亦自願俾卓Sir逮捕。至於梅姐,雖然有天堂大獻殷勤,不過佢始終情繫樂少,仲學埋電單車,戴住樂少條頸鏈,所以天堂都係無望架喇。

魏德信死前不停回憶同Scarlett嘅片段。(劇照)

不過有一個消息可以令梅姐開心吓,因為原來樂少係無死到!在大結局的尾段,樂少同歡喜哥一齊出現返喺泰國,就話將條命交俾歡樂哥,因為係佢救返自己一命,情況就好似一開頭佢同Pak-key(黃德斌)嘅關係咁。咁樣鋪晒線仲唔係想拍續集?不如一齊數一數續集會有咩人出現,首先,又係大結局片尾嘅伏筆,馬國明以魏德信的細佬身份出現,宣言要幫大佬同家族報仇,講咗卓Sir、歡喜哥、梅姐和天堂4個名出嚟,所以第三輯相信會有呢5個人。跟住樂少講佢無死,可以預埋佢,猜fing作為歡喜哥頭馬,而第一輯(但時間線是比較後)亦有份,相信第三輯都會有佢。仲有康Sir,又係第一輯已經有,至於另外3位民間刑事情報科成員羅小絲(黃山怡)、李文雄(陳國峰)和佘樂成(喬寶寶)又話會考返入警隊,再見到佢哋都唔出奇,呢度加埋都有11個。

馬國明突然出現客串一角。(劇照)

不過,根據兩輯都有份編審嘅人士透露,其實《使徒行者3》連劇本都未有,佢話呢一種留伏筆嘅玩法其實第一輯已經有。原來係咁,相信都只係唔想太過封死條後路,遲啲有機會就拍咁解,咁馬明BB就慘喇,專登去客串一場,但佢真係好想再開拍第三輯,而家隨時一場歡喜一場空!

希望真係有下場喇。(劇照)
+13