【使徒行者2】第三輯變古裝版？ 馬國明so sad：要重新選過演員
撰文：溫菁莉
出版：更新：
上星期五播完的TVB劇集《使徒行者2》，最後一幕馬國明突然以魏德信的細佬身份出現，咁樣留伏筆完全是為第三輯鋪路，好多觀眾都好期待，正當大家FF馬明會點樣出現嗰陣？奇怪的事情發生了，就係馬明隨時食炸糊被飛，事緣「黑警Madam Cheung」蔣祖曼日前出席活動表示，《使徒行者》第三輯將會拍古裝版，網民聽到都打個突，更擔心型爆登場的馬明下落，《香港01》即刻打俾正在上海工作的馬國明問個究竟，佢都好大反應咁話，「我又無聽過，但如果真係拍古裝版都係一個突破！」
馬明現身《使徒行者2》大結局真係好驚喜！
+6
如果卓Sir用返黃藥師嘅造型現身《使徒行者》第三輯，其實也不錯！
如果樂少拍古裝，究竟個髮型要點整好呢?
不少網友聽到話《使徒行者》會拍古裝版都覺得好搞笑，仲話飾演卓Sir的三哥可以完美複製用返黃藥師個造型，但馬明聽到消息就真係灰哂，他說：「其實都唔知古裝版有無我，因為古裝版應該係成個故事都改晒，可能要重新選過所有演員都得喇！」但他亦為古裝《使徒》祝福，他說：「如果拍古裝都唔一定係搞笑嘅，我諗都幾得意， 古代宮廷嘅鬥爭其實某程度上都可以將《使徒行者》，反臥底、臥底呢條橋放入去，最重要係劇本點寫。」
蔣祖曼做古裝都好靚女！
到底第3輯係咪用古裝版去呈現呢？雖然仲未知，但一班網友都幾大反應，仲講笑話，「《使徒》係咪想變《皆大歡喜》？」「三哥會唔會真係用黃藥師現身呢？」真係未開播先爆笑，我認為第3輯就一定開得成，當中最期待嘅就一定係有百變髮型王之稱嘅周柏豪，古裝look會係點呢？不過就算《使徒》變咩版都好，都一定要俾返個重戲男主角馬國明囉，人哋特登閃現登場，唔係過橋抽板呀？至於劇中佢揸住支來福槍點交代，加少少穿越情節咪得囉，反正變古裝版都變《皆大觀喜》，不如玩盡啲變《使徒行者３之超時空皆大歡喜》，到時一定爆。