張繼聰回憶7年前和謝安琪同抑鬱:當時食行藥好口乾好頭暈好攰

撰文:
最後更新日期:

張繼聰半夜三更寫長文感性分享。

張繼聰向來都好感性兼又喜歡跟大家分享他的生活點滴與感受,昨晚凌晨時份阿聰就突然有感而發,於facebook寫了一段講述自己七年前患有重抑鬱,但仍出席叱吒頒獎禮撐太太謝安琪 (Kay) 獲得叱吒樂壇女歌手銀獎的事,亦唔介意令人諗返起他曾經有過「廢柴老公」這個稱號。他透露頒獎禮當晚因為「食行藥,所以「好口乾,好頭暈,好攰」,而他當時的心情除了開心感動之外,其實同時都「好驚好怕,好擔心食白果嘅我唔知又會比人點嘲笑,總之九萬幾個層次又li 又lu .....」當年阿聰的成績無論在樂壇或影壇都確實平平,太太Kay卻正值事業的高峰期,作為男人且是人夫的阿聰所承受的壓力,唔使講都知一定是很大很大。

 

張繼聰當年患有重抑鬱但都出席頒獎禮撐愛妻。

他又指原來太太Kay當時亦都和他一樣「抑鬱病都好猛烈,承受好大嘅壓力」兩公婆可謂同病相憐。他形容自己與太太都是「考緊宇宙俾我 (同佢) 嘅試」Kay當年咁好成績卻竟然並不快樂,這亦令阿聰參透了一個大道理「你話世界係幾奧妙?快唔快樂,原來同得到幾多無關。 快樂,其實係因,唔係果」「每一個經歷其實冇乜意義,意義係由自己去界定,但係一定比你想像中美好同重要,就算當時係幾惡啃都好,好好行自己嘅路就掂」而阿聰就是靠住一份毅力和堅持,終於走出了他人生的低谷,無抑鬱之餘仲好幸福快樂,且在演藝事業上考取到優異的成績,劇集和電影接唔停,讓太太可以安心放下工作全心照顧屋企。

 

Kay當年成績好好但原來亦同老公一樣患有抑鬱。

最後阿聰就總結一下自己的心情話「好似我家吓睇番段片,發現原來果日唔係路障,而係加油站,令我選擇之後嘅路,決心尋找快樂同自在,亦係果日,令我更有勇氣去更多嘅頒獎禮,食更多嘅白果。所以你話,人生幾美好,根本就冇衰嘢」睇他現在咁豁達咁積極咁正面兼仲識鼓勵其他人,半夜三更都不忘發放正能量,就知他已經完全好返晒啦。

 

阿聰一家四口非常幸福快樂。

張繼聰facebook原文:

長文,隨便出入
無意中睇到依段片,好歡樂,唔係講七年前我個郁同髮型帶比大家嘅歡樂,而係.....
七年前嘅依一日,當時嘅我可以話係考緊宇宙俾我嘅試....啱啱出世嘅朋友仔可以去歷史博物館查吓我當時嘅外號,就會略知一二,當時我嘅花朵真係好猛
Anyways,當時我嘅抑鬱病非常嚴重,非常想又非常怕去依個Party 。想去,係因為太太當時成績非常出色,我一定要係現場支持佢同見証佢努力嘅成果,怕去,係因為我當時嘅成績非常冇乜成績.....
片中所見嘅我,其實當時食行藥,所以好口乾,好頭暈,好攰,個cam又起勢隊住隊住,同時又好感動,好替太太開心,好想抱住佢,再同時好驚好怕,好擔心食白果嘅我唔知又會比人點嘲笑,總之九萬幾個層次又li 又lu .....
同時台上嘅太太,成晚雖然得到好多個獎,其實當時嘅佢抑鬱病都好猛烈,承受好大嘅壓力,佢都係考緊宇宙俾佢嘅試....
你話世界係幾奧妙?快唔快樂,原來同得到幾多無關。 快樂,其實係因,唔係果
如果你咁得閒睇到嚟依到,朋友,我想講嘅係,每一個經歷其實冇乜意義,意義係由自己去界定,但係一定比你想像中美好同重要,就算當時係幾惡啃都好,好好行自己嘅路就掂
就好似我家吓睇番段片,發現原來果日唔係路障,而係加油站,令我選擇之後嘅路,決心尋找快樂同自在
亦係果日,令我更有勇氣去更多嘅頒獎禮,食更多嘅白果
所以你話,人生幾美好,根本就冇衰嘢

阿聰依家事業發展得極好。

+19
+18
+17


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。