【降魔的.專訪】馬國明都會上高登:網絡潮語我都會識嘅

撰文:林迅景
出版:更新:

《降魔的》中,馬國明一直被人大讚,除了演技了得之外,其貼地抵死的性格亦大獲好評。由當年被人說是天然呆,本身樣子呆呆下之外,在頒獎典禮上的經典時刻也令人印象十分深刻。其實在上一套《心理追兇Mind Hunter》馬明飾演一個陰暗衝動的心理學家,演技已經受人力讚,今次在《降》也有出色的表現,年尾爭獎有望。

馬明演技好而家已經人人都知。(林迅景攝)

究竟如何由一個天然呆變成貼地司機呢?在接受《香港01》訪問時他說:「其實無話點樣做嘅,感覺貼地係因為本身個角色貼地呀嘛。戲入面佢(馬季)又唔係有錢,個角色本身已經好貼地,所以我哋都會用返啲貼地嘅感覺囉,觀眾都會留意到我哋用返啲短褲、T-shirt,我知道有啲的士司機係好有型,好似掉低架車就可以去蒲咁,我哋唔係要嗰種。」雖然劇集好評眾多,不過都有人投訴太多粗口,「其實係嘅,尤其是趙永洪,佢係會講多啲,我哋度故仔嗰陣監製已經話俾佢呢個角色粗啲,我覺我ok嘅,大部份現實嘅的士哥哥都唔會太斯文。」除了粗口,劇中也有一定的潮語出現,例如:推到完場、J一吓、有請小鳳姐等等,原來都有原因,他說:「有啲係編劇嘅,亦有啲係我哋現場爆少少咁,因為大家都知道係要啲乜嘢,好多時趙永洪都會爆肚。我都會上網睇呢啲嘢,所以某一啲網絡潮語我都會識嘅,我咩網都上㗎,香港討論區、高登都有上。」

原來馬明都有上高登。(林迅景攝)

上兩回的專訪都提及過,馬明對《降》的劇本是十分喜歡的,連《心》也是,不過他就慨嘆這套劇在香港不被大眾接納,他說:「《心理追兇Mind Hunter》劇本個佈局係好正,奈何可能有啲家庭觀眾未必睇得明,連我阿媽都話睇唔明,監製野心好大,我直情覺得有少少西片嘅格局。講返我個角色,因為佢本身係一個心理學家,佢女朋友俾人害死,佢好想查返係邊個殺死佢女朋友,佢本身係心理學家呀嘛,咁佢自己就營造返一個幻象令女朋友出現返。佢以前鍾意食煙,佢一食煙女朋友就會出嚟叫佢唔好食,再將自己屋企書房佈置返做女朋友個office,完全一模一樣。喺心理學上,同一個環境、氣味下,幻覺就會容易出現。呢一個佈局,我一睇劇本就覺得好正,有少少荷李活佈局嘅電視劇,但係觀眾係睇唔明嘅,我都明白嘅。好似你第一次睇荷李活電視咁,第一次覺得好好睇但未必明,係要翻睇第二第三次先明。《心理追兇》係一個好好嘅劇本,但睇怕香港電視模式嘅人真係未必會明,但唔可以話香港觀眾明乜就去拍乜,作為一個創作,深嘢同觀眾明嘅嘢都要拍,正如早幾年TVB一直無拍鬼怪嘅題材,因為返唔到大陸,無咗個市場,直至呢幾年有返《鬼同你OT》、《一屋老友記》同《降魔的》,你會發現香港觀眾都鍾意睇鬼怪嘢,所以其實唔應該俾個市場焗住你拍咩,唔好限制自己個空間。當然,公司一定想顧觀眾的口味,所以拍出來的劇也就比較一式一樣,也是無可厚非的。」

《心理追兇Mind Hunter》入面佢真係做得好好。(電視畫面)

除了在香港,馬明也開始向大陸發展,始終內地賺錢的機會多太多,他說:「我而家拍緊大陸一套電影叫《美麗戰爭》,但係香港唔會上,因為個題材好內地嘅,今次成廿幾三十個女仔圍住我,因為係一套model嘅勵志片,仲有譚耀文份。我都想搵多啲錢,上一次上去拍我全廣東話,今次我都用返國語,希望可以適應返上面,譚耀文因為上咗去好多年,佢嘅經驗幫到我好多,可能對我將來上去發展都會有幫助。我而家都叫識多咗大陸嘅製片人,希望可以透過咁而傾多啲合作,佢哋唔會再睇邊個係視帝視后㗎喇。」原來連馬明都開始向大陸發展,希望TVB不要再流失人才喇。

唔通佢又要返大陸發展?(林迅景攝)

不過其實香港演員在大陸十分吃香,連馬明自己也感受到大陸導演對香港人的愛戴,但由於一些原因,香港演員在大陸的市場還未能全面展開,他說:「我哋香港演員喺內地評價好高,一來因為我哋價錢平,同內地嘅紅星比我哋係好平。其次係大陸人覺得我哋香港演員好容易服侍,一啲都唔麻煩,我哋TVB出身就係咁樣,會對戲,會企喺度俾對方講對白(有啲位單頭講嘢,對手演員可能只係求其一個人),大陸嘅紅星係唔會咁做,佢哋無可能咁做,可能佢哋拍兩個大頭就走,其他鏡頭你搵替身同佢做,好誇張㗎。但大陸導演覺得香港演員好好,仲要抵用,奈何內地每套劇用香港台前幕後嘅人數仲有個限制,如果放寬,香港演員會愈來愈多機會,尤其是TVB捱慣嗰班,又識走位,又捱得唔麻煩。我聽過一個內地好紅嘅演員,佢著咗件好靚嘅衫去到片場,就同導演講我今日唔換衫㗎喇,拍就拍,唔拍我就走,連咗戲佢都唔理你。原來而家佢哋嘅氣燄係勁到咁樣,你要連戲就唯有後期剪接,當然呢個係極端,唔係全部大陸演員都係咁,大家唔好誤會,只不過係大陸某啲好紅嘅演員已經去到咁,億億聲嗰堆,所以導演會覺得香港演員好好。」的確身價上億的演員,又真的可以有風駛盡𢃇,不過就會惹人話柄,說到底對自己也沒有甚麼好處。

香港演員真係寶嚟架!(林迅景攝)