【萬千星輝】藝員互選TVB視帝視后　過半數推馬明稱帝

TVB昨日 (7日）宣布《最佳男/女主角》及《最佳男/女配角》，雖然提名名單花多眼亂，但大多數的藝員心目中已經有晒心水。《香港01》就問到接近二十位藝員，他們投票選男主角及男配角都有明確意向，大多投馬國明做視帝，而男配角方面，幾乎所有人都投張振朗。

講起視帝，今年都話係馬國明與王浩信之爭，但講起二揀一，都係揀馬明！雖然馬明自嘲話：「大家其實都係想睇我食白果個樣多啲！」但至少他的女友黃心穎會支持她：「梗係揀馬國明喇！我好鍾意睇《降魔的》！除咗我，我身邊啲人都好睇好佢，都同我講，覺得佢今次做得好好呀！希望佢得喇，好替佢緊張！」

除咗女朋友之外，視后級及前輩級人馬都好支持馬明，就好似鷲哥，佢直接點名：「我投畀馬國明，因為我有同佢踢開波，就覺得佢踢波同做戲一樣，態度都好認真，今次都做得好好，就投畀佢喇。」而家燕姐都一臉認真就講起馬明：「佢做得真係好。佢呢個角色唔知係咪真實嘅佢，做得好入型入格。（好似的士佬？）哈哈，係呀！」田蕊妮雖然與蕭正楠好熟，但都有留意馬明的演出：「阿蕭就等多年喇，唔想再見到馬明佢天然呆喇！」而視后之一的定欣就話視帝太難揀，揀咗三個心水，當中都有馬明，反而就冇好拍檔陳展鵬囉‧‧‧‧‧‧

另一方面揀選王浩信的少眾，包括蔡思貝及岑麗香。蔡思貝就同過馬國明及王浩信合作過，但她依然投給傳過緋聞的王浩信：「因為盲俠呢個角色唔易做，佢都落咗好多心機，加上《踩過界》劇本咁好，所以都係投畀浩信喇。」香香就非常可愛：「我唔識睇中文，但拍咗45集《溏心風暴3》，所以就認得呢四個字，咁我就投王浩信喇！」而《踩過界》的張振朗，是男配的大熱人選，覺得他非常投入角色，把谷一夏發揮得淋漓盡致。

至於女配角及女主角獎方面，反而沒有呼聲最高的角色，女配角最多講起姚子羚。姚子羚更揚言不會投票給好姊妹胡定欣：「佢拎得好多次喇！」而王君馨又話唔投鮑姐：「佢都係拎返電影嘅影后喇，佢好高層次！」其他都是自己劇投畀自己人，沒有太大驚喜。