《壹號皇庭V》神秘歌曲《No Matter》原來是TVB劇萬能key

撰文:張嘉敏
出版:更新:
就係呢場分手戲播咗《No Matter》。

無綫經典劇集《壹號皇庭V》日前重播的第20集入面,最尾一場戲講述陶大宇在餐廳與宣萱吃晚飯期間向她提出分手,宣萱欣然接受,兩人表現得好瀟灑咁分開了,但其實內心都好難過。而這場戲的背景音樂,就是一首名為《No Matter》的英文歌。原來好多觀眾同網民都好鍾意這首歌,紛紛嘗試尋找原唱版本,不過就找極都找不到,令這首歌更添神秘感。而這首歌亦出現過在多套TVB劇的重播版入面,例如《新紮師兄》續集、《妙手仁心》、《天地豪情》以及《寵物情緣》等,有網民形容是TVB劇萬能key的歌。

宣萱表面瀟灑其實內心好傷。
陶大宇都係。

既然咁多人鍾意呢首歌,香港01記者就電話訪問了《壹號皇庭》系列的監製鄧特希,問下他是否知道呢首歌的資料,他說:「其實嗰場戲原本係播另一首歌,係Michael Learns To Rock嘅《That's Why You Go Away》,到後嚟重播時先轉咗播呢首《No Matter》,呢首歌唔係我揀嘅,我懷疑係版權問題要轉歌,可能係啲罐頭嚟。呢首歌唔係我心水,我自己一定唔會揀呢首。」

監製鄧特希。

監製又話拍攝《壹號皇庭V》新加入的吳啟華同蔡少芬這個搭檔是最意外的收穫,「佢兩個喺劇入面嘅感情線好好睇,佢哋演得好,觀眾又鍾意,所以就造就咗之後拍《妙手仁心》搵返佢哋做情侶,就似係之前嘅延續。」對於有指拍《壹號皇庭V》時經常要飛紙仔,咁演員有否成日爆肚講對白呢?監製表示:「無得爆肚,演員佢哋會自己豐富返啲對白,用自己嘅方式去演繹,但就好少話會爆肚。其實飛紙仔先唔可以爆肚,驚會接唔到落去,之前曾經試過搞錯咗啲對白搞到要重拍,所以大家都唔想有咁嘅情況出現。」

+3