【P牌網購團．多圖】網購不停中伏 貨不對辦棉花糖機玩到著火？
今時今日購物已經進化到唔止足不出戶，只要拎住手機，真係去緊洗手間都可以俾錢買嘢。格價容易咗感覺上買到平嘢，但質素又係咪成正比呢？平時都睇過唔少買家中伏案例，平嘢係咪一定無好嘢？由羅敏莊主持嘅ViuTV新節目《P牌網購團》，每集用唔同主題喺預算價錢內網購一堆產品，第一集就以「小朋友生日會」為主題，用$1000為6個小朋友慶祝生日，有得玩有得食，仲玩到著火添，真係睇到都牙煙呀﹗
$1000可以做到啲乜？喺香港買個蛋糕都要二三百，不過呢集節目以$1000預算，成功購得蛋糕、餐具、食品製作用具、特別造型服飾、玩具、佈置裝飾以及表演用具，仲有$200淨﹗咁平，質素有無問題呢？首先有個大水池連釣魚竿及玩具，SIZE極大足夠俾多位小朋友一齊玩，可以做水池又可以放沙入去，$126係超值嘅；另一樣令媽媽大讚嘅就係金屬汽球佈置，香港買一隻英文字都十幾二十蚊，呢次佢地買齊「HAPPY BIRTHDAY」連埋坐地汽球柱都係$124，兩位媽媽羅敏莊同DADA都驚呼：「好抵呀﹗」
不過世事邊有咁完美呀，好似$57買番嚟嘅彩虹千層蛋糕，送到時係得幾包粉、幾枝食用色素，要自己花時間親手整﹗兩盒CREAM雖然有冰袋雪住，不過又要等包裝送貨集運，嚟到主持人手上乜都融晒啦，奶類製品無雪實在太危險，最終佢地只能整一個「千層無CREAM班戥」……另一個自製汽水噴嘴，使用前羅敏莊都話想買個返屋企玩，點知用咗一次之後就瘋狂漏汽水，未飲唔見一半，仲攪到大家忙住清潔添。
全集最伏嘅就絕對係棉花糖機，一開始開機倒糖都真係有製作出少量棉花糖，點知開心完無兩分鐘，棉花糖機居然著火﹗好在當時一班主持人正在試用，小朋友仲未到咋，佢地都話「棉花糖機真係MUST NOT嚟架﹗」。當然啦，網購其中一個大風險就係無得睇實物，又無售貨員現場教授點用，學羅敏莊話齋：「唔會放落口嘅嘢好似生日帽同汽球，網購真係好選擇。」不過食物同電器啦喎，都係搵啲有信譽嘅舖頭先好買，安全至上呀。