【鋒味】謝霆鋒要求素食女王Daphne煮肉 被拒後FOUL出局惹爭議

撰文:
最後更新日期:

自從謝霆鋒放低結他改揸刀,話題不減反增,由佢主持嘅節目《鋒味》,嚟到第四季,除咗繼續同藝人到世界各地食好嘢,仲加入廚藝對決環節,搵來60位廚藝高手進行比拚,最後勝出嘅8位組成戰隊,跟隨謝霆鋒同全球大廚進行廚藝較量。不過剛開季播出就惹來爭議,事關Chef Nic要求素食女王Daphne Cheng以肉類為題作賽,引起全球素食者不滿,指謝霆鋒及節目組極不尊重。

Daphne Cheng有素食女王嘅稱號,年僅28歲已經成為全球一線素食主廚。(Facebook圖片)

呢位素食女王Daphne Cheng雖然只得28歲,但佢嘅名聲相當響亮,係紐約最受歡迎嘅素食主廚之一,預訂佢嘅晚餐至少要等上一個月,婚紗女王Vera Wang都曾經係佢嘅座上客。呢次佢參加《鋒味》節目拍攝,原意為咗喺中國推廣素食文化。點知喺節目中被謝霆鋒點名,同另一位擅長煮肉嘅廚師高超,交換題材下廚作賽,Daphne即場斷言拒絕:「我已經16年沒煮肉了,我不會為了一個比賽去改變。他們說我需要做肉食,否則就只能淘汰,抱歉我沒法做,所以我只能離開。」

Daphne對於被要求煮肉食,寧願棄賽一口拒絕亦不願違背個人立場。(影片截圖)

要求一個素食廚師煮肉,令謝霆鋒飽受批評。(影片截圖)

聽到Daphne一口拒絕煮肉,霆鋒明顯感到愕然,然後話:「所有台前幕後的工作人員都是,我們尊重這個(你的選擇),如果不做的話,就等於棄權,你是這樣的意思嗎?」Daphne最終表示寧願棄權。其實早喺第一輪初賽時,Daphne都係遇上高超,一肉一素作品令三位評審印象深刻,當時霆鋒已經講過:「這還是在一個比賽的基礎上,如果有很多肉類,我知道對你一定會是很大的影響,我非常希望你接著堅持,你這個素食要大家吃得更健康這個路,但是我不能通過。」明顯地霆鋒基於比賽係為咗挑選隊員,到世界各地比賽嘅基礎下,其實覺得Daphne係唔適合加入做隊員,只係無諗到第二次比賽居然就要求對方煮肉。

公道啲講一句,謝霆鋒首次見到Daphne時,已經講過支持佢嘅理念(煮素食),但以挑選隊員嘅原則來說不能通過。(影片截圖)

+5
+4
+3

有好多網民批評霆鋒及節目組,為咗加強節目對立感,要求素廚煮肉係非常不尊重,甚至係欺凌同公開侮辱的嚴重行為。但原來當中仲可能有欺騙成份,Daphne回覆網友留言中寫到:「我被邀請參加這個節目,因為我是一個素食廚師,節目承諾我的原則將得到尊重亦不需要做肉。當主持第一次說我需要在下一輪比賽做肉時,因為我的中文不好沒聽懂,然後他們仍然堅持我不需要做肉,主持會允許我做素食。不幸的是,事實並非如此。」

Daphne回覆網友留言中寫到,節目承諾她不需要煮肉食,如果所言屬實,其實算得上呃佢去拍攝。(Facebook截圖)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。