【永恆亞視】招募藝人撐開台 網民票選勝出者贏合約你恨唔恨？
撰文：洪曉璇
出版：更新：
亞視已經更新咗官網，感覺上都幾緊貼潮流。（網上截圖）
今時今日喺香港，想表現自己比以前容易得多，拍片放上網多人睇已經可以自稱KOL，比較有質素嘅可以儲到一批支持者，收錢拍廣告片。網上紅咗之後呢？好多KOL最終都係走入娛樂圈，拍戲做主持拍廣告，始終喺香港，電視係最快入屋嘅方法。永恆嘅亞視無限復活，18號即係聽日就會推出新嘅OTT數碼平台，原來較早前已經喺網上招募藝人，網民都有份投票，勝出嘅除咗有份藝員合約仲會有I PhoneX添呀﹗
由於大量藝人已過檔，亞視網上招募人才，順便做一個選秀節目，的確慳水慳力又容易引起注意。（Facebook截圖）
永恆嘅亞洲電視，就好似雜草一樣有極強生命力，就算拖幾個月糧依然可以運作，被申請破產都可以拆得掂，加上唔少藝人都話其實亞視算係好高薪，入去做嘢似乎都唔錯。亞視新網頁入面有個「你的藝人招募計劃」，參加方法好簡單，提交個人資料、5張照片、列寫過往演藝經歷，連自我介紹短片都唔使拍已經搞掂。進入決賽後於指定時間喺亞視Facebook專頁進行不多於一小時的直播，仲會開放俾網民投票添。
參加方法都幾簡單，不過11月中開始至今好似無咩人知，仲有一星期截止，好想快啲睇吓有邊啲有志人士參賽呀。（網上截圖）
玩得比賽當然想贏，但贏咗有啲乜？除咗有「亞洲電視數碼媒體有限公司藝人合約」仲有豐富獎品，不過可能未傾掂贊助，豐富獎品暫時只得一樣，就係 iPhone X，唔知係64GB還是256GB呢？不過參加得比賽，相信參賽者會關心簽完約有幾多演出機會多啲啦。
其實未傾掂贊助都寫iPhoneX落獎品一欄，証明就算最終無贊助，亞視都會自掏腰包買俾得獎者，都幾有心呀。（網上截圖）