【港女講感情】洪天明飲醉酒被扶上房？男人飲酒其實比女人更危險

洪天明本身最為人熟悉嘅一件事就係喺《獎門人》贏到好多舊花之戀同FX Creations嘅流行皮具購物禮券，但前幾日佢被人影到喺上海同女仔拖住手入酒店，起初大家都覺得張相太朦，認為未必係洪天明嘅。但空穴來風，大家都好好奇究竟發生咩事，又話有人見到洪天明喺夜店攬女狂歡，又有人話係東莞時不時都見到成班「獎門人」搵食，洪天明仲覆記者話：「Funny. No reply la.」，Funny？觀眾睇你就覺得Funny喇，全城傳到滿城風雨，最後內地經理人公司幫佢回應話係因為洪天明當晚係飲醉酒，個女仔只係扶佢上酒店，兩個人真係順便拖手，並冇發生任何事，你信唔信啊？不管你信不信 反正我就不信了。

事後老婆周家蔚都幫口話只係一場誤會，話對老公係信任，相信佢只係飲醉酒，乜飲醉酒係咁嘅咩？通常睇電視劇，男人飲醉酒最少要兩個同佢差唔多Size嘅人扶，仲要好吃力，睇怕扶洪天明呢個女人肯定平時舉開鐵，單手拖住已經可以扶一個醉酒男人上酒店。其實呢個花之戀達人已經唔係第一次，14年被人影到佢同其他女仔傳緋聞，佢老婆已經出面撐過佢一次，讚佢：「老公！你是最好的！看到新聞寫你不好我很不忿！在這裏同大家說，我是超級幸福的女人跟媽媽！我老公很愛我！我很信任他！」，Come on James，第二次喇，究竟要你老婆幫你補幾多次鑊？

關於飲酒呢件事，通常都係女仔飲酒被人話得多，成日都有網民大條道理話女仔落bar飲酒搏咩啊，又或者係出得嚟飲酒就預咗啦，講到飲酒好似件自甘墮落嘅事。但講到咁危險，但反而男人就老鳳同兄弟飲酒就係一件天公地道嘅事，公平咩？其實男人成班約埋飲酒都好危險，你睇洪天明咁就被人扶上去酒店，酒能亂性，一陣上咗酒店都唔知會發生咩事。

通常男人嘅飯局成日都唔會帶女友去，話咩啲人你唔識，廢事悶親你，反正有各種嘅理由。但次次兄弟飯局都夜一夜先返，唔係話唔畀你去，但咁樣會令女友好冇安全感，話十二點前返，通常都變通宵，話預通宵會散，最後都朝早先見人，究竟發生咩事？唔通真係「What happens in Vegas, Stays in Vegas.」咩，想要女友唔好擔心，最好嘅方法係邀請埋佢去，帶佢見吓你嘅朋友，如果你係愛一個人，應該將佢嘅感覺放喺你第一位，而死都唔肯帶女友見兄弟嘅，肯定身有屎！