【溏心風暴3】48歲唐文龍單身過聖誕　無女陪唯有搵兄弟睇星戰

《溏心風暴3》中飾演型佬教授阿Nic（鄭立安）的唐文龍，一出場就成為城中熱話。網民like爆之餘，亦對阿Nic這個角色恨之入骨。皆因他在愛情上又盡享齊人之福同時擁有Daphne（胡琳飾演）及黃以愛（陳敏之飾演）2位靚女（即係個角色衰花心囉）。不過戲內大家睇佢就幸福滋潤，但戲外唐文龍的感情生活其實都dry dry地。唐文龍話假日都係同好兄弟睇下《Star War》。

鍾意《星球大戰》其實都冇咩唔好，話哂都係「男人的浪漫」，就算是唐文龍這種鐵錚錚的硬漢也喜歡。唐文龍接受《香港01》訪問時也大方承認自己是一名宅男。「其實我係宅男嚟㗎。我係鍾意運動啦練功夫，但係你話出去玩出去蒲又唔係咁多機會。我都打機嘅，行街食飯睇戲正常人做嘅嘢，我都會做，但係就喺屋企多嘅，睇吓書呀咁樣囉。」照咁睇都唔錯，又係型佬，又識泰拳，又會做運動，又唔蒲，又黐家，又夠文青⋯

講到興趣喎。其中一個可以增進感情嘅活動，就梗係睇戲啦。型佬唐文龍接受《香港01》訪問時說：「睇戲睇西片，其實我咩片都睇，韓國日本泰國我都睇。睇鬼氣啦科幻警匪、美劇加拿大劇好鍾意，甚至乎吸血殭屍都鍾意。（最近睇咗邊套？）《星球大戰》《正義聯盟》。」雖然就離題咗少少，但係唐文龍都講咗2句關於《星球大戰》電影觀後感。（冇計，men talk吖嘛）唐文龍：「《星球大戰》呢，今次我滿意嘅。特技嚟講我就覺得麻麻地喇，不過就睇個故事啦。而我覺得對於Luke Sky Walker嚟講，就俾咗一個好好嘅結尾佢。（咦，有睇開喎。）有㗎，我細細個就睇星球大戰長大㗎嘛。」

睇到呢度，相信大家都應該對唐文龍嘅興趣有返多少認識。至於最為重要的，「型佬唐文龍的擇偶條件」，他想了一想就回答說：「女朋友嘅條件。我就鍾意白雪雪嘅，高矮就真係冇乜所謂。同我有共同嘅價值觀啦，最緊要傾得埋，呢個好緊要。（有共同興趣，例如鍾意睇戲，又會加分？）其實都係一件好事，因為恐怖片、科幻片，我乜嘢語言都會睇晒。如果佢鍾意呢一種生活形態，對我嚟講都係一個配合。」

如果對於「筍盤」呢個字眼有保留的話。不妨又睇吓劇中飾演阿Nic（唐文龍）的老婆胡琳點講：「我覺得佢好識得take care其他人。我發覺佢好細心無論係身邊嘅女仔，cameraman或者打燈（師傅），所有人都好細心。仲有我覺得佢知識淵博嘅程度，就係你問佢任何一樣野，佢都可以同你講兩個鐘頭，所以佢係一本好厚嘅書。」

聽講唐文龍對上一個女朋友都係喺facebook識，所以大家嘅機會都係平等㗎。咁啱又係聖誕節，真係機不可失⋯