何家千金何超蓮是人生勝利組眾所周知，昨日（12月21日）就出席賽馬會舉辦的一個講痤，宣傳海報上還標榜了超蓮是執行董事身份，標題是《夢想計劃－高峯論壇》，幾種元素加埋，就令到題目好吸引。當大家以為超蓮會爆甚麼致富之道、富豪生活等等...引來不少傳媒聞風而至。初時大會更表示不容許採訪，認真巴閉。好在超蓮到場之後證實只係溝通上的誤會，「最後冇事」才邀請傳媒入場。但原來整個講座10分鐘就完結，內容亦只是宣傳她舉辦的慈善團體「Smile With Us」。換着第二個，觀眾可能會「柴台」。但講者是超蓮的話，就當然沒有所謂，因為美女是有特權的。

宣傳海報就寫着《夢想計劃－高峯論壇》，大家心裏以為就應該是設立在大學講堂的那種形式，咁就錯晒啦。當日場地其實就只是在一間佈滿聖誕節裝飾品的小型餐廳內，現場放了幾排座椅而「台下」也只有大約30位觀眾。如果要形容的話，其實似一個聖誕節聯歡會多啲。一開場，何超蓮坐低之後就問工作人員：「其實我係咪可以唔用Mic吖？一樣之嘛。」之後就繼續演講：「其實呢，我知道大家呢，係好支持我呢個慈善團體Smile With Us啦，咁呢，今日呢就要講，點樣創新點樣創業啦。咁呢，我哋Smile With Us...」看來「呢」字是超蓮的口頭禪，之後演講入面仲出現咗十幾次添。不過超蓮這個慈善團體不需募捐，她在演講中說：「我哋唔會要人捐錢俾我哋，因為我哋想帶正能量俾香港人，所以唔會募捐啦。」超蓮表示計劃不會募捐，咁經費又從何而來呢？她說：「我哋同大機構募捐籌咗２百萬。」「我哋想人由年輕開始就做呢個慈善，而唔係一啲好大嘅機構，可能大家覺得我哋上咗年紀有好多錢先嚟做慈善，但我哋想promote嘅係：用自己嘅力量去幫人，感染人，而唔係淨係用錢囉。」

何超蓮接受《香港01》訪問時表示：「今次係我人生第一次講talk，分享創立Smile With Us嘅經驗，點樣創新，新媒體點樣可以幫到一個人創業。」講座雖然就主要圍繞在慈善團體Smile With Us的分享介紹上，而稍微少了一點個人分享，好在一班學生觀眾都聽得好開心，冇人瞌眼瞓。不過唔知係咪班學生怕羞，何超蓮講解完之後竟然冇人舉手問問題。講座之後，超蓮接受《香港01》訪問時說：「可能代表我講得OK，講得唔錯，所以就冇人問問題，哈哈。」雖然這次演講只是10分鐘，但其實何超蓮事前準備了1小時的講稿，可惜到場之後才被告知只有半小時時間。

不過話明係創業講座，做得講者的何超蓮其實來頭不少。2012年在倫敦大學經濟課一級榮譽畢業之後就已經在會計師樓打工，其後在回到公司打理家族生意後，更是花了3年時間去翻新了位於澳洲柏斯的州際酒店，11月㡳仲已經開咗幕添。據知何家在這個項目仲投資咗8千萬澳幣添。身為酒店管理人的何超蓮說：「我每個月都要返去一次，睇下入住率，人客滿唔滿意，嘢食好唔好，間房有咩要執漏，各樣嘢都要睇。」