G.E.M.孖超蓮聖誕開P　送頭髮烏黑素係咩玩法？

鄧紫棋（G.E.M.）昨晚在大連舉行巡迴演唱會，當地溫度低至零下6度，她仍身穿紅色心心衫加超短裙，真係好勁！完成演唱會之後，G.E.M.笑言今年終於可以放聖誕假慶祝一下。不過早前她原來已與好姊妹何超蓮及李蘊等人在家開Party，還親自下廚：「今年我哋自己整咗牛扒、溫泉蛋、海膽、沙律，仲試咗煮一種暖酒。」

幾個女仔開聖誕P，一定會交換聖誕禮物，G.E.M.就話自己玩開「Secret Santa」，她笑說：「呢個遊戲係要收禮者估吓邊個送禮物畀自己，我抽中送禮物嘅對象係一位成日坐 Office 嘅朋友，所以我買咗一條健身帶畀佢，想佢係辦公室可以活動筋骨。但我見到其他朋友送嘅禮物太大陣仗，我覺得自己份禮物實在太小兒科，我就即刻上屋企樓上搵吓有冇其他存貨，順便塞埋入去禮物袋度。」結果搵下搵下，阿G.E.M.找來一盒頭髮烏黑素做禮物，朋友見到之後唔知笑好定喊，阿G.E.M.話：「個朋友問我係咪嫌佢好老，要佢活動筋骨，又要佢烏黑頭髮！」