【福布斯】2017全球最高收入演員榜出爐 超級英雄佔4席
撰文：洪曉璇
出版：更新：
仲有不足一星期2017年就過去，又係做下年度總結嘅時候。福布斯公布「2017年全球票房最高TOP 10演員排行榜」，雲迪素（Vin Diesel）以16億美元票房登上第一位， 同樣有份拍《狂野時速8》嘅「The Rock」狄維莊遜以15億美元票房屈居第二，兩個人今年都有三部作品上映，至於第三位就係憑住《神奇女俠》爆紅嘅以色列女星姬嘉鐸（Gal Gadot）。但係頭十大都未見今年中國最強電影《戰狼II》主角吳京上榜，唔通中國市場被排擠？
第一位：雲迪素 16億美元《3X反恐暴族：重火力回歸》《狂野時速8》《銀河守護隊2》(視覺中國)
第二位：狄維莊遜 15億美元《狂野時速8》《逃出魔幻紀：叢林挑機》《沙灘拯救隊》(視覺中國)
雲迪素今年一共有3套電影上映，分別係《3X反恐暴族：重火力回歸》、《狂野時速8》以及《銀河守護隊2》，全球票房達16億美元，折合港幣約125億票房登上第一位。單係計《狂野時速8》票房已達12億美元，所以排行第二嘅亦係有份參演呢套戲嘅狄維莊遜。至於女演員票房收入最高嘅，就一定係Gal Gadot，憑住《神奇女俠》以及《正義聯盟》兩套超級英雄電影，票房收入已達14億美元，成績相當驕人。
第三位：Gal Gadot 14億美元《神奇女俠》《正義聯盟》(視覺中國)
第四位：Emma Watson 13億美元《美女與野獸》(視覺中國)
貴為中國超級英雄，吳京居然無影實在令人驚訝。(資料圖片)
其餘上榜嘅「超級英雄」仲有排第7位嘅新蜘蛛俠Tom Holland（8.88億美元）、《銀河守護隊》男主角「星爵」Chris Pratt（8.64億美元）以及第9位嘅雷神Chris Hemsworth（8.45億美元）。不過國產英雄吳京居然榜上無名，話晒《戰狼2》票房達56.8億人民幣，折合美元8.7億，就咁睇都應該僅次蜘蛛俠排第8，有業內人士猜測，因《捉妖記》票房造假一事，外國權威票房統計並未將中國票房統計在內，所以吳京並未上榜。
第五位： Johnny Depp 11億美元《加勒比海盜：惡靈啟航》和《東方快車謀殺案》(視覺中國)
第六位：Daisy Ridley 10.8億美元《星球大戰8：最後絕地武士》《東方快車謀殺案》(視覺中國)
第七位：Tom Holland 8.88億美元《蜘蛛俠：強勢回歸》(視覺中國)
第八位：Chris Pratt 8.64億美元《銀河守護隊2》(視覺中國)
第九位：Chris Hemsworth 8.45億美元《雷神奇俠3：諸神黃昏》(視覺中國)
第十位：John Boyeya 8.15億美元《星球大戰8：最後絕地武士》《Detroit》(視覺中國)