【多圖】蔡思貝露小蠻腰跳《到此一遊》　張寶兒發住燒拍MV

憑住《降魔的》一劇而爆紅的歌曲《到此一遊》近期大受歡迎，真係唱到大人小朋友都識背。早前TVB更加搵嚟5個港姐小花跳住唱《到此一遊》。今日佢哋為明天的表現而進行綵排，睇真啲，着住便服嘅5位小花，真係有啲似五星戰隊，唔知佢哋有冇興趣成立返對組合進軍樂壇呢？

MV播出之後，不少網友都認為5位的表現尚有改進空間，原來連表演者之一的張寶兒都認同。張寶兒：「其實我嗰日係發緊燒，同埋加上我嗰日要同條蛇合作，可以做到嘅嘢都係有限。要控制住條蛇去郁，又唔可以俾佢就咁攤喺度，又唔可以俾佢過度活躍。所以都要啲時間去捉摸，同埋拍攝時間有限。（本身驚唔驚蛇？）唔驚嘅，睇下有冇毒啦。（袁偉豪睇咗個MV未？）佢琴晚都睇咗，好彩我冇同其他男artist跳舞。不過我覺得佢都覺得OK嘅。（佢有咩評語？）唔知啊你問下佢，哈哈。」

《到此一遊》MV之中，另外一個話題就是，大家都覺得蔡思貝靚咗好多。現場睇落，蔡思貝的舞步比起其他四位，又的確跳得幾好，仲有條小蠻腰添。蔡思貝：「多謝大家讚賞，可能唔同嘅look俾到大家煥然一新嘅感覺，始終藝人都可以試多啲唔同嘢。例如今次主題係韓feel啲，而大家又好耐冇見過蔡思貝長頭髮，比較嫵媚啲嘅感覺。俾大家見到我另外一面，而又buy我嘅，我都好開心。」

據知這次MV的製作費到七位數字。而幾位小花為了這個MV更在工作之外抽時間到排舞室練習，每晚由凌晨12點開始排舞，3，4小時的排舞結束後才回家，然後第二日又開始工作。今次實在係TVB制作的「另一巨著」。