「韓流專家」西瓜離開商台　自言最仰慕Jackson王嘉爾@GOT7嘅才華

西瓜今日就正式宣佈月底離開商台。（網上圖片）

一直喺商台同森美主持開《早霸王》嘅西瓜（本名：李澄）今日喺Facebook個人page上宣佈月底就會正式離開商台，人稱韓流專家嘅西瓜早前公開接受訪問都有講過自己第一隊鍾意嘅K-pop組合係少女時代，少女時代嘅演唱會仲係西瓜第一個睇嘅韓國演唱會添！

西瓜第一隊鍾意嘅就係少女時代。（網上圖片）

繼少女時代之後，西瓜最鍾意嘅就係Epik High。（網上圖片）

西瓜本來擁有自己嘅電台節目《西瓜大發》，不時都會請韓星上去做訪問，好似MXM成員林煐岷、金東賢、MAMAMOO成員頌樂、玟星、輝人、華莎、GOT7香港成員Jackson王嘉爾等等，西瓜又有主持過池昌旭、Astro、MXM等嘅香港活動，接觸到唔少韓星！其實森美都有主持唔少韓星show，好似Wanna One同孔劉咁，雖然西瓜係《早霸王》到就成日畀森美鬧，但唔知森美同西瓜私底下又會唔會交流下咁呢？

西瓜主持過唔少韓星活動，當中包括池昌旭，希望池昌旭退伍後西瓜可以再做池昌旭活動嘅主持。（網上圖片）

西瓜今日接受《香港01》訪問時表示：「近年做過唔同韓星活動同訪問，其實每個對象都好深刻，因為個個都好有個性、思想、又對工作好熱情。但就好仰慕最近訪問過嘅Jackson嘅才華同埋動力。另外池昌旭都係位好值得拍手嘅藝好，因為池昌旭好愛錫自己嘅Fans！」之後再問到西瓜平時有無同森美交流時，西瓜就好多謝森美：「無論係唔係韓星，森美經常都會喺工作上畀意見我，我有時都會問吓應該點做，而森美做司儀好叻、好熟練、又有好多諗法，所以我都喺佢身上偷咗好多師。」雖然西瓜即將離開商台，不過嚟緊都會繼續留意西瓜喺司儀、配音、其他網上工作等等，期待佢喺韓娛方面都會繼續有新表現啊！

西瓜仲有主持過MXM首個海外Fan Meeting。（網上圖片）

「韓流專家」西瓜離開商台 自言最仰慕Jackson王嘉爾@GOT7嘅才華

更多圖片

「韓流專家」西瓜離開商台　自言最仰慕Jackson王嘉爾@GOT7嘅才華