【3日2夜】張曦雯列出男友8大條件唔簡單：要幫貓狗執屎執尿

《3日2夜》播到第3集，相信大家睇住張曦雯（Kelly）帶大家遊澳洲食玩，又玩過山車，又食海鮮，大家都一定睇得好開心。今集更有Kelly抱抱樹熊添。不少網民睇完之後就話好想做嗰隻樹熊，仲大讚她好「gfable」。雖然她被稱為「打機女神」，不過這位「完美女友」的擇偶條件並唔係咁高。

Kelly説：「我自己都係一個好開心嘅人，所以如果另一半都係好開心，好鍾意笑嘅話就最好啦。（笑容要點先合格？）好似我咁得唔得吖？（高度呢？）高過我就最好啦，雖然我好高但係我都想要有一個小鳥依人嘅感覺。呢個我都知道係難啲嘅，所以高過我嘅話就最好啦。」

眾所周知，Kelly除了鍾意大自然，另一興趣就是打機。原來打機也包括在她的擇偶條件當中。「興趣？打機囉，不過逢親係男仔都鍾意打機。同埋鍾意小動物，因為我有貓貓同狗狗，當然男朋友就要幫手做嘢，執屎吖執尿，哈哈哈。（仲有咩要求？）要同屋企人close，因為代表佢都會同屋企人close，要孝順。（使唔使靚仔？）我都唔係好鍾意靚仔，但係咁啱之前識嘅都係靚仔，但係太靚仔又唔得，因為會太姿整。（收入呢？）我自己工作收入都OK，所以我冇要求男朋友要賺到某一個數。（如果要你養埋佢得唔得？）咁又唔OK喎，因為我自己負擔好大，仲要養埋貓貓狗狗。」

總括來說，Kelly的擇偶條件就是：身高高於1米75、不能太姿整、有燦爛笑容、為人樂觀開心、喜愛小動物（要幫手執屎執尿）、愛打機、孝順、收入能照顧自己即可。睇落其實都唔係好多唧，符合以上條件的巴打們，記得加油喇，情人節等緊你。