【找數】郭富城24年前承諾結咗婚向全港巿民派利市：人人有份！
撰文：冼燕珊
出版：更新：
好消息！雖然政府好多年都無派糖，但唔使驚，我哋今年(可能)有郭富城向全港巿民派利是，事關佢於1994年，即係24年前，曾經喺電視鏡頭下，許下承諾，話如果佢結咗婚，一定會派利是：「希望有一日我將來結咗婚，我才派利是，個個都有份，我講過嘅，全港嘅巿民都會收到我嘅利是。」
機會嚟喇！飛雲！多謝城城先。(網上截圖)
多謝城城呀真係！等咗24年，終於都等到你結婚喇，於去年4月迎娶比自己細23歲嘅方媛！恭喜賀喜，全港巿民今年收多一封利是過年。城城呢條24年前接受祝文君訪問嘅片，早前已經於Big Big Channel上回帶過一次，今日大年初一，再被應節擺上檯，好多網友都留言，大家一齊集氣叫城城找數！
全港巿民等咗24年終於等到你結婚喇城城！（資料圖片）
唔知城城自己其實記唔記得自己講過呢翻說話呢？其實唔驚嘅，城嫂方媛幫佢生咗個小公主吖嘛，找完數之後，再同全港巿民拜返年，幫手逗翻啲利是可能仲有賺添！
城城可以派完利是再同全港巿民逗返利是, 分分鐘仲有賺。(微博圖片)