【數百萬當係碎銀】何超蓮霸氣玩魚蝦蟹 當中隱藏一個驚人重點
撰文：彭嘉彬
出版：更新：
何超蓮於個人IG上載即時動態，一張張金牛真係睇到眼都突。 (網絡擷圖)
新年流流親朋戚友難得聚首一堂拜年，除咗逗利是同接受成班三姑六婆嘅高難度審問，不外乎打下牌玩下魚蝦蟹。「小賭怡情」，新年點都要玩返「兩手」先有氣氛嘅。日前賭王千金何超蓮於個人社交平台instagram上載了限時動態，原來正是與好友們玩「豪華版」魚蝦蟹。
之所以話係豪華版，基本上同大家平日嘅玩法都一樣，亦係用同一樣「魚蝦蟹」墊枱紙，不過銀碼上就完全升級。大家平時玩「魚蝦蟹」都可能係十蚊八蚊咁玩，掉張廿蚊銀落去都隨時有種「肉赤」嘅感覺。超蓮今次嘅規格差得遠，枱上只見一張張紅色($100)、啡色($500)、金色($1000)紙幣，唔講仲以為玩緊大富翁。數一數，成枱分分鐘都有幾萬蚊，不過對超蓮嚟講，意識上都應該同大家一樣係玩緊「碎銀」啫！
超蓮為新年真係做足準備，唔單止飾物要紅，連頭髮都要紅。 (網絡圖片)
一張限時動態圖片引起網民熱議，有網民笑說：「估唔到都有幾張50蚊。」更有人開始數學家上身，計算莊家的贏錢的機率。但萬萬想不到，有眼利的網民發現，一個如此豪華的賭局中，竟然有人手持iPhone7。雖然未知手持iPhone7的主角是否便是何超蓮，但網民仍「嘴下不留人」表示：「有冇咁窮呀？」隨即引起罵戰，有人反擊：「李嘉誠咁多年都係戴住隻精工咋。」亦有人狠批：「窮人思想先會用手機當係身份象徵。」其實新年又有乜好嘈呀？上少陣討論區，同屋企人一齊過仲好啦！
網絡生態真係無奇不有，一個小小嘅限時動態，都可以引起各種討論。都算係一種新年嘅好節目。