開放式廚房不利女主人? 李居明叫地產商:唔好廳加個灶就當廚房

撰文:
最後更新日期:

香港人人嘆上車愈來愈難,而地產商推出的細價樓又愈來愈納米,依家大部份新樓都無特別設廚房,美其名係開放式,實則似茶水位,一向投資有道的李居明,琴晚其新戲寶《美哉秦少游》於新光上演,與主演蓋鳴暉(Joyce)講起買樓,Joyce仲話貴到連佢都唔敢買,師傅大把物業唔使驚,不過佢就話睇唔過眼依家啲納米樓無廚房,佢話不利風水喎。

李居明師傅話家不可無廚房,因為對女主人不利。(陳順禎攝)

師傅話:「我哋風水師最反對屋企無廚房位,因為無廚房就等於無女主人,亦等於無老婆,或者女人住進去,都對佢不利,所以我呼籲地產唔好唔整廚房,唔好喺個廳求其加個灶就當廚房,希望地產商以後斷絕呢種風氣,因為對香港嘅女人不利!」

師傅呼籲地產商唔好再起無廚房的樓盤。(陳順禎攝)

不過依家後生一代又真係好多「無飯家庭」,TVB節目《安樂窩》主持林穎彤(Bella)接受《香港01》訪問,佢都話唔鐘意開放式廚房:「因為我都鐘意煮嘢食,如果整開放式廚房就會成間屋都好大油煙。」不過其實Bella亦唔鐘意傳統嘅廚房,佢話依家同媽咪住,所以廚房係媽咪嘅主場,睇過無數樓盤嘅佢,一早已經諗好將來自己屋企嘅廚房點整:「我會用玻璃間隔劃開廚房,咁樣就唔會令屋企咁大油煙。」不過除咗減低油煙味之外, Bella就話唔知呢種「偽開放式」廚房於風水學上會唔會好啲。

《安樂窩》主持林穎彤指自己將來的廚房想用玻璃做間隔。(IG圖片)

其實於風水學角度,無廚房除咗對女主人不利,仲難以匯聚財氣,古語有云:「開門見灶,錢財多耗。」爐灶代表家中的財庫,開放式廚房會令爐灶於屋企中外露,就好似將錢箱長期展露人前,所以有損家宅嘅整體財運,即使本身的收入不錯,聚財能力也會減弱。所以Bella就算用玻璃間劃開廚房,但都會俾人見到個爐灶,於風水學上都係唔係咁好。

不過玄學始終不是精密科學,例牌都要講句:「信則有,不信則無」,各位看官請斟酌參考,本來樓價已經令一眾打工仔大嘆上樓難,辛苦上到車,有個完整廚房都唔係要求好高啫!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。