雨僑羅力威歐式喜帖曝光 經典品牌婚戒惹女士羨慕
3月31日將會舉行婚禮嘅雨僑同羅力威，早前曝光嘅婚紗照引來哄動，大家都相當期待佢地婚禮更多細節曝光。來到單身嘅最後一個月真係忙到不得了，繼早前佢地跟足傳統過大禮後，呢日準新娘子雨僑喺IG上載簡約風喜帖，宣布要開始「炸」賓客啦。不過最吸晴嘅應該係相片左邊嘅小紅盒，正式曝光來自經典奢華品牌嘅結婚戒指。
傳統嘅紅色喜帖信封，配上透白歐式喜帖，帖上印有佢地嘅婚禮Logo，用兩個A字代表一對新人（Ava及Adason），兩個字母背靠就好似喻意二人今後互相扶持。西式喜帖配上佢地將會喺淺水灣舉行婚禮，感覺相當一致。雨僑留言話：「今天開始要轟炸大家咯，話說最近壓力很大，也不只是因為要結婚，而是以我的性格會工作到最後一秒，最近我最治癒的活動就是入-紅-包。話說當我知道豬隊友把餅卡都入好了我覺得好傷心，他還問我要不要拆出來讓我從頭再入，治癒過夠。」好閃呀！
不過留言再閃都不及左邊嘅小紅盒搶眼，盒內放上佢地嘅婚戒，從戒指盒及戒指款式，較粗身設計配上鑽石，應該就係經典珠寶品牌Cartier出品，睇返官方網站，呢款設計嘅價錢由一粒鑽嘅$16200至6粒鑽嘅$41800一隻不等，如果要加入個人化設計應該唔止呢個價錢。
其實早幾日3號下晝，羅力威按傳統習俗過大禮，並由阿威的家姊負責統籌。時下好多人過大禮都係懶人包套餐，但阿威做到足，Ava表示：「我爸爸媽媽從簡都得，但男家好好，佢哋搵海味時，原來鮑魚、髮菜、冬菇等等都有好多唔同等級，好彩識朋友幫手，樣樣都買啲，意頭啦。其實最緊要心意，噚日樣樣都好開心、好滿意，媽咪我都笑到見牙唔見眼。」
傳統上過大禮時一對新人需要避席，一身紅噹噹的準新娘 Ava喺屋企等待，阿威就陪家姊拎過大禮的大堆禮物到女家樓下，雖然阿威不能上樓，但就請親友送咖啡俾 Ava 享用，小小的細心舉動已令準老婆冧到不得了，Ava 說：「過大禮送埋咖啡，佢真係好細心嘅！過大禮之後我哋一家人去咗飲茶，將過大禮收嘅禮帶返去長洲，因為我喺長洲長大，仲有親戚係嗰便。」