陳智燊原來係隱藏肌肉男 收埋40吋胸肌：40歲先練唔係咁容易
撰文：冼燕珊
出版：更新：
TVB小生陳智燊（Jason），曾經係TVB嘅當家小鮮肉，雖然依家已經40歲，兼且已經封埋盤，但佢依然Keep得好fit，甚至比以前更fit，今日佢出席護膚品牌活動，雖然著咗件白色西裝，但都掩蓋唔到佢嘅二頭肌同胸肌，Jason接受《香港01》訪問，話佢依家有40吋胸肌，佢仲分享佢健身嘅秘訣，首先係飲食方面：「朝早食個奄列都有6隻蛋白，加埋夜晚嗰餐，每日都要食十幾隻蛋，同埋食多啲雞胸，吸收多啲蛋白質。」
Jason話依家有40吋胸肌。(微博圖片)
Jason已經封盤，成為人夫了。（IG圖片)
從營養學上嚟講，蛋白質對身體組織，如肌肉的生長和復元尤其重要，而除咗飲食，當然要配合運動，Jason話以前無好認真咁去研究點樣練肌肉，直到呢一年先認真咁去健身，搵咗相熟嘅健身教練朋友，同佢制定健身目標：「一個星期跑三至四日步，每次半個鐘，之後就去做GYM，做吓推胸同引體上升，加埋熱身拉筋前後都要個零鐘頭。」Jason仲有補充話如果屋企附近無GYM，遊樂場都有一啲設施可以健身，前提當然係唔好同小朋友爭嘢玩啦。
梁碧玲攝
Jason說做運動可以令皮膚更好：「做完運動，出一身汗，當身體強壯，抵抗力好的時候，皮膚會更緊緻一點，同更加有光澤。」其實Jason都講得有道理，運動可以提高整個身體嘅血液循環，將更多的氧氣和營養輸送到皮膚，令全身容光煥發，除咗運動，Jason都有敷吓Masks：「其實男士都要護膚，試過拍劇拍到好Chur，落妝嗰下好辛苦，因為皮膚太乾，就拎Sarah(宋熙年)啲Mask嚟急救。」
Jason飲食運動雙管齊下，揀練肌肉。（IG圖片)
不過Jason話只係畀自己依家嘅狀態75分：「仲有好大嘅進步空間，希望可以練得更加fit，始終40歲先嚟練唔係咁容易，要再努力啲！」睇Jason依家咁fit，佢真係下好多苦功去Keep㗎，各位男士都要加油！