張繼聰解釋點解次次過關都被扣查：我只係證明唔到自己身份
撰文：溫菁莉
出版：更新：
相信每次大家拎起自己嘅身份證時，都會好感觸，因為可以再次見到當年自己青澀嘅樣子。估唔到身份證對於張繼聰都有段故，話說佢昨晚在Instagram中上載短片，講到自己幾年前拍緊《老表，你好hea》，雖然當時未有留鬚，但每次到內地工作過關時都被扣查，「係，係真係被扣查，所以成日都聽到後面有啲朋友講話：『喂！嗰個張繼聰被人拉咗喎！』通常都係要出示埋身份證喇，仲大件事，因為我張身份證係十幾年前影嘅。」究竟係咪真係咁誇張呢？
大家覺得阿聰係咪真係唔同咗呢？
他直言負責政府邊關的工作人員做得十分正確，「因為我嘅同事、工作伙伴、甚至我自己都唔係好相信呢三個人係同一個人。我喺到澄清一次，我冇走私，冇被人拉，我只係証明唔到我自己嘅身份啫。」
阿聰而家個樣成熟咗好多！
估唔到好多網友睇完條片，都即刻留言話好想睇究竟張相有咩唔同，係咪誇張到每次過關都被扣查，隔咗一陣沖完涼嘅阿聰就話估唔到網友的反應咁群情洶湧，所以決定公開照片！之後續道，「每一次過關，就算我拎住我自己張回鄉卡，我都係心虛，我每次都好努力去嘗試，但係結果只係得一個，例如我試過笑住啦，我覺得咁樣自己好可疑，我試過認真啲啦，咁就直接入房喇。」最後阿聰就笑言多謝網友嘅關心，好快就變返認真樣，「其實你無關心過我。」