【蝸居宅急變．有片】Queenie屋企過百枝蠟燭 骷髏骨模型擺客廳
撰文：張嘉敏
出版：更新：
無綫一連5集的《蝸居宅急變》昨晚經已播完，由day 1播出至今惹來大批網民於討論區上熱烈討論，不過多數都是負評。大家對於主持人，即所謂的家居創意達人陳莉敏 (Queenie) 的品味同設計似乎唔多buy。網民批評Queenie亂咁教人改造家居，不切實際，擺設唔實用，大量放置蠟燭和製作紙巾燈甚至隨時會引起火警，有人直情覺得Queenie好似玩緊屋主咁。不過，如果看過Queenie本人的家居後，就應該會明白到她是真心想幫人打造理想家居的，她只是將自己喜愛的東西放到別人的家裡，因為她屋企都係咁樣。
Queenie自己成屋都係蠟燭。
睡房都放滿蠟燭。
Queenie都好大方，公開自己的家居畀大家欣賞，當然她一定是覺得自己屋企好正先至會開心share啦。早前她就於youtube上載了一條介紹自己屋企的短片，入面有齊她在節目中教人擺放的紅酒木箱、盆栽以及大量的蠟燭。Queenie表示她很喜歡蠟燭，而她家中蠟燭多的程度可以用誇張來形容，幾乎每個角落都可以搵到，保守估計有過百支，熄晒燈點蠟燭反而有些陰森感覺。屋內還有不少她自製又或是廢物利用的擺設，當然仲有好多她最愛的淘寶貨啦，她亦有拍片介紹，教人點樣可以好似她咁「將地拖變Dior」。
佢屋企都勁多盆栽。
連盆栽上面都有放滿蠟燭。
全屋的裝飾盡見Queenie獨特又另類的品味，例如一棵太陽眼鏡樹，好難想像會有幾惹塵，如果成日都要逐副抹又真心累。另外餐桌旁有隻黑頭髮黑眼睛的洋娃娃，樣子相當鬼魅，仲要用蠟燭照住，不禁令人想起Annabelle，Queenie竟然搵隻娃娃來陪自己食飯，她的品味真係唔係人人識得欣賞。其實Queenie間屋都有好多雜物，就連鼓同成個人咁大的紙骷髏骨擺設都有，她在節目中經常教人「斷捨離」，自己就放咁多嘢喺屋企，不過她的屋企勝在夠大，擺多多嘢都無所謂。
好獨特嘅太陽眼鏡機。
隻娃娃個樣好鬼魅。
仲會同Queenie一齊食嘢，睇Queenie碟水果擺盆就知美感呢家嘢真係好主觀嘅。
+14