【專訪】舞台劇令演技層次昇華 劉嘉玲:因為演員有一個壞習慣

撰文:史順宜
出版:更新:

影后劉嘉玲在鏡頭前給予人感覺高貴優雅、做事認真、無論打扮以致工作的專業態度都展示出獨立女性的一面。當她接受《香港01》專訪時,她自言自己其實超玩得!而且她更挑戰《香港01》為她而設的出賣朋友遊戲「奪命朋友」,原來她最「攞命」的朋友竟然是華語天后──王菲!詳情睇片!

嘉玲姐自言從事演藝事業多年,她一直被舞台劇的魔力吸引,而且每次做完舞台劇後,她的演戲層次更有所昇華:「呢個感覺真係要作為一個演員先會體會到。我自問都係一個專業嘅演員,導演要求我拍戲時做任何嘅表情、情緒,我都可以用各種方法去達到對方要求。然而《杜老誌》舞台劇令我演技提升到另一個層次,我要更加用心去聆聽對手嘅說話(對白)而唔係單單要記住自己嘅對白。因為演員會有一個壞習慣,就係當對手未講完句對白,自己已經先諗定下一句對白,咁樣出嚟嘅節奏自然唔會同正常人嘅對答一樣。所以依家嘅我係會聆聽對手講完所有對白,會先消化,然後再選擇用咩嘅態度、語氣、說話,再去回應對手嘅對白,而呢個處理手法喺我喺舞台劇上學到。所以一位演員要學識對白與對白之間留一個空白位,出嚟嘅效果觀眾自然會睇得過癮,因為觀眾都需要空間思考。呢一個方式對我嚟講真係一個新發現。」

嘉玲姐憶述《杜老誌》有一場後巷醉酒戲令她大感挑戰。(攝影:陳順禎)

嘉玲姐續說:「一個演員夠膽喺舞台劇上留白真係需要好大嘅信心、勇氣,因為所有嘢都係LIVE,做咗唔會有NG嘅機會。我記得《杜老誌》有一場戲係講我喺後巷飲醉酒,呢一場戲我好深刻,因為難度好高。好多演員演一個飲醉酒嘅角色感覺上真係『演緊』,佢哋會有好多破綻。」她解釋:「真真正正飲醉酒嘅人係唔想畀人知佢飲醉酒,佢會千方百計做一啲行為去話畀懷疑佢飲醉酒嘅人聽『我冇飲醉酒』、『我好清醒』、『我連行路都係行緊直線』、要演活一個飲醉酒嘅人就係要畀觀眾明白你飲酒後識得『扮清醒』,單從呢一場戲我感覺到自己演技層次有所提升。」

提到今次《奪命証人》將與謝君豪演夫妻檔,她表示:「謝君豪係一位我非常欣賞嘅舞台劇演員。有佢與我同場我真係會特別安心,因為佢嘅舞台經驗足以解救舞台上所有突發事件。佢係當時我做《煙雨紅船》舞台劇(2000年-2001年)嘅副導演,而《杜老誌》佢係做另一條線嘅故事。所以今次可以同佢做一對夫妻,我覺得開心同期待。」

今次嘉玲姐與秦沛(Paul哥)首次在舞台劇合作,Paul哥更戲言要多向她學習,他又表示自己年紀大,擔心在台上因緊張而要上廁所,嘉玲姐笑言:「Paul哥好鍾意撒嬌。其實我同君豪真係睇住Paul哥嘅戲長大。佢係一位好有經驗嘅演員,所以我哋從來都唔需要擔心。我好希望我哋三個可以共同炮製一個大家喜歡嘅舞台劇送畀大家。」

你可能感興趣