【開心速遞】林淑敏大談養生心得：感恩老公嘅支持
撰文：賴家杰
出版：更新：
《開心速遞》大小姐一角而令到佢人氣急升嘅林淑敏今日出席健康品牌活動，最近Mandy頻頻出席品牌活動，都想知道係咪都賺到好多外快，Mandy回應：「都唔係嘅，同呢個品牌其實都合作好耐，所以今日一定要嚟支持下。」
林淑做今日與毛舜筠出席健康品牌活動。（陳順禎攝）
談及保養方面，唔知道大家會唔會留意到其實Mandy佢都將自己保養得好好呢？Mandy笑住咁講：「冇人留意我Keep得好好，咁其實係咪我Keep得唔好呀，哈哈。」觀眾當然唔會咁諗啦，問到可唔可分享下保養心得，Mandy答到：「其實自己好多野唔會食，例如甜品啦，自己都戒左7年糖，自己糖份攝取盡量都係飯及水果，好多精緻甜品或加工食品自己都唔食，差好遠㗎啦，咁樣就可以令到身體更好。」，聽完Mandy保養身體嘅方法大家都可以參考一下。
林淑敏演場更派花俾長者。（陳順禎攝）
至於Mandy咁注重飲食健康當然身邊有一個好重要嘅人支持佢，嗰個就係佢老公，Mandy透露到：「我老公佢好好，我唔食牛肉佢又陪我一齊唔食，到宜家我唔食甜品佢都慢慢開始陪我一齊唔食。」，講到Mandy老公咁Sweet對佢，Mandy都好開心講到：「好Sweet㗎，佢對我好好㗎，不過佢都唔係一個口甜舌滑嘅人嚟，佢係行動型嚟，有時候見我攰會煮麵俾我食，有時候我頻頻撲撲會又會車我番公司，我覺得咁樣夠㗎啦，以一個家人長遠關係嚟講。」
林淑敏表示有一個很好的老公（陳順禎攝）