【棟仁的時光】企跳李旻芳唔推Job好捱得:試過做替身俾蟲躝上身

撰文:
最後更新日期:

無綫劇《棟仁的時光》播出以來反應都唔錯,好多人都讚袁偉豪演得幾有Feel,不過前晚嘅一集(第11集)裡面,最搶、最出嘅唔係佢喎,而係客串嘅李旻芳。劇中,李旻芳就因為感情同工作問題而喺天台度企跳,好在袁偉豪同唐詩詠及時開解到佢,阻止到佢自殺。好多觀眾都讚李旻芳做得好好,拍喊戲喊到鼻涕都出哂嚟之餘,仲話佢電話鬧爆變態老闆係「食屎狗」呢一下做得好爽。而李旻芳本人都喺社交網站出Post,多謝一班觀眾咁支持佢。

【棟仁的時光.多圖】李旻芳唔畀屋企人睇自己性感演出:好尷尬

【3日2夜】李旻芳主持惹負評 意見全收:節目前提自己唔好咁興奮

好多觀眾都讚李旻芳喺《棟仁的時光》表現好好,連滴鼻涕都好有戲。(電視畫面)

+10
+9
+8

李旻芳亦喺文中感謝喺佢背後默默支持自己嘅屋企人,特別係對佢無微不至嘅媽媽:「佢驚我冇啖好食,就每朝靜蠅蠅咁將準備好新鮮嘅飯盒放在枱面比我帶返工,話係尋晚食淨嘅,怕我話佢辛苦。」而佢亦都數咗好多事例出嚟,多謝媽媽一直以來靜靜雞咁幫佢分擔生活壓力。

【3日2夜】被指聲線表情太誇張 李旻芳:其實都算進步咗

李旻芳喺網上多謝觀眾支持,亦撰文感謝喺佢背後默默付出嘅屋企人。

咁當初屋企人係唔係都好支持李旻芳入行?佢接受《香港01》訪問時就咁講:「其實佢哋好反對,媽媽同家姐都覺得好不設實際,可能係因為本身做緊空姐,都算係一份荀工,同埋佢哋覺得娛樂圈好黑暗,好似個大染缸咁。我同佢哋傾咗成晚,話只要我做好自己,保持自己原則,唔受他人影響,唔好走捷徑,唔好貪小便宜,就唔會誤入歧途同行差踏錯。之後佢哋就放心畀我試一試,過一排後變得好支持我,因為佢哋知我仲係一個乖乖女。」佢仲話依家同媽媽出街時都會拖手仔,臨返工時都會錫對方一啖先出門口。

李旻芳同媽媽感情好好,出街都會拖手仔,呢張相就係喺莫斯科旅行時影嘅。

李旻芳笑言媽媽不時都會問佢做得開唔開心:「佢話如果做得唔開心就唔好做喇,做唔掂可以試下做生意。」咁其實係唔係真係有過類似念頭?佢話剛剛讀完藝員訓練班時真係想轉行:「因為我覺得自己好冇用,好似乜都唔識咁,有啲人可能讀演藝出身或者做Model,好習慣對鏡頭,但我呢方面好差,我對住鏡頭會好緊張。同埋個個都靚仔靚女,相比下我好普通,腿又唔長又唔幼。」

依家好多主持、演出機會嘅李旻芳,入行時就覺得自己唔掂咩都唔識,甚至有諗過轉行。

視鄭丹瑞係恩師嘅李旻芳就好多謝對方肯揀佢入訓練班:「我問過佢點解揀我,佢就話覺得我好捱得,而我都好肯定我好捱得,我從來都唔推Job、唔揀Job,好似之前試過做替身俾蟲躝上身,做替身著泳衣,做替身危企喺天台邊等等,我都冇諗過推,我覺得入得行就要咩都做咩都試,因為所有嘢都係要由低做起。」

李旻芳從來都唔會推Job,唔顯眼嘅工作都會肯做,仲試過做替身時俾蟲躝上身。(梁碧玲攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。