宣萱防腐唔靠整容 最驚開刀打針：怕返唔到轉頭
撰文：賴家杰
出版：更新：
一直被稱為不老女神的宣萱，相隔16年再度跟同一美容公司合作做代言人，宣萱好感慨講：「其實冇人能夠敵得過時間洗禮，唔可能有一個人零變化，好多人都同我講保養得好好，我只係盡量將過程拖慢，同埋自己堅持唔會去整容，我都好驚，唔敢打啲乜野。」
宣萱出席美容活動。（陳順禎攝）
但其實現今社會唔好講藝人，好多市民都已經接受微調，Jessica就話：「除非有一日好需要啦，但我自己係會好驚....好驚（開刀？）係呀，打針開刀都好驚，面呢樣好怕返唔到轉頭，大家都鬧我諗得太多。」
Jessica表示堅拒整容。（陳順禎攝）
Jessica還表示如果有工作須要，會盡量食少啲去減肥，盡量夜晚食少出街食飯，朋友飯局都會推，但若果Jessica搵男友係咪都需要陪佢減呢？Jessica就話：「唔會，唔會強迫佢陪我一齊咁做，呢啲小事嚟。唔減肥都可以有好多事情要磨合，不過最緊要大家要夾，最重要係價值觀，譬如我自己就將錢排得好後，但如果搵到一個將錢放得好重，咁大家好多事情或性格都會撞，有啲事情錢買唔到，最緊要搵到一個開心，享受人生嘅人。」
Jessica搵另外一伴條件係懂得享受人生。（陳順禎攝）