【歸去來】首部內地劇人氣急升酬勞唔重要　29歲何傲兒：機會重要

近年唔少香港藝人北望神洲，將重心轉移內地幾乎都做得有聲有色，最近又迎來另一位新鮮人加入，她就是Lily何傲兒。出道11年的她近日接拍的第一部內地劇《歸去來》播出，飾演留學生凱瑟琳一角令人眼前一亮，劇集只播出短短時間就收獲唔少粉絲，因此《香港01》就找來Lily訪問，她相當開心有如此好成績。

雖然唔係女主角又唔係女配角，不過留學生凱瑟琳這個角色對女主角（唐嫣）起了好大作用，作為出道以來首部電視劇有如此好成績（網絡點擊破3億），Lily都喜出望外：「好開心，有機會參與拍攝呢部劇，是另一個階段的挑戰，呢部唔同之前的網絡劇，而且我是原聲演出，國語都係自己講都又驚又喜。」據知《歸去來》是由收視保證的劉江導演執導，他之前所執導的《媳婦的美好時代》﹑《黎明之前》﹑《我們結婚吧》都有好成績，今次同導演合作，Lily極度開心。

因為飾演一位在美國居住的香港人留學生，Lily除了講粵語之外仲要講普通話，正正因為在劇集中粵語﹑普通話轉變流暢完全沒有「港普」，引起唔少粉絲大讚她語言能力，其實背後她下了唔少苦功：「因為自己對自己有要求同有努力過，都請了老師教。原本在香港已經有請人教，去到北京同樣找老師，我們透過微信上堂，每次一個小時，價錢都是百幾元一個鐘，出來成績咁好都好開心。」另外，因為劇中她有唔少講粵語部份，受到唔少內地網友喜愛，她自己都感到開心：「講返自己語言，觀眾都鍾意好開心。」

能夠做到凱瑟琳這個角色Lily絕對是幸運的：「多謝一位伯樂他的推薦，可能他睇到我之前（香港劇集）作品，就好幸運地加入劇組。（酬勞滿唔滿意？）滿意，不過機會重要過所有嘢，唔係用錢去衡量的。」

為了拍呢部劇遠赴美國等地拍攝半年，Lily眼見內地拍攝模式都大讚配套好好：「TVB好快，場地所限，又係廠景。而內地當然有好同唔好，同樣拍攝都要求好快，不過配套就好好，或者投資大拍出來的畫面都靚，就好似現場Monitor有6－12部唔同部門都睇到，香港就得3－4部。」另外，劇組唔理有冇戲拍緊，都住同一間酒店，她認為比起香港拍攝方便好多。

第一部內地劇就同內地一線女星唐嫣有唔少對手戲，Lily開心之餘更在她身上學到咩叫專業精神。雖然開始開拓內地市場，不過她亦唔會放棄香港市場，未來會兩邊跑，因為只要有需要她演戲的地方，她都會去皆因她是一位喜歡表演的人。